काठमाडौं, २९ साउन । मुलुक संघीय प्रणालीमा गएसँगै गठन भएको लुम्बिनी प्रदेशका पहिलो मुख्यमन्त्री शंकर पोखरेले तीन वर्ष पाँच महिना २५ दिनपछि राजीनामा दिएर विदा भएका छन् ।
उनको सत्ता वहिर्गमनसँगै लुम्बिनीमा हिजो बिहीबारमात्रै कुलबहादुर केसीको नेतृत्वमा नयाँ सरकार गठन भइसकेको छ । तर, नयाँ सरकारले भावी दिनमा के–के गर्छ भन्ने भन्दा वहिर्गमित मुख्यमन्त्री पोखरेलले साढे तीन वर्षमा के–के काम गरे भन्ने विषयले यतिखेर धेरै चर्चा पाइरहेको छ ।
त्यसो त निवर्तमान मुख्यमन्त्री पोखरेल स्वयम्ले पनि आफ्नो कार्यकालमा भएका महत्वपूर्ण काममा बारेमा सामाजिक सञ्जालमार्फत फिहरिस्त प्रस्तुत गरेका छन् । नेकपा एमालेका स्थायी कमिटी सदस्य समेत रहेका निवर्तमान मुख्यमन्त्री पोखरेलले लुम्बिनीको विकास र समृद्धिका लागि के–के गरे त ?
हेरौं केही बुँदाहरू–
तीन वर्ष पाँच महिना २५ दिन लुम्विनी प्रदेशको मुख्यमन्त्रीको जिम्मेवारीमा रहेर आजबाटट विधिवत रुपमा विदा भए । यस अवधिमा प्राप्त सहयोगका लागि सबैलाई धन्यवाद । माननीय कुलप्रसाद केसीको नेतृत्वको नयाँ सरकारलाई कार्य सफलताको शुभकामना ।
मेरो मुख्यमन्त्रीत्वको कालमा व्यक्तिगत र संस्थागत रुपमा संघीय लोकतान्त्रिक गणतन्त्रलाई संस्थागत गर्ने सन्दर्भमा महत्वपूर्ण कामहरु अघि बढे । मुख्य कामलाई यस रुपमा शुत्रवद्ध गर्न सकिन्छ ।
१. प्रदेश स्थापना हुँदाको समयको प्रदेशको वस्तुस्थिति झल्कने स्थितिपत्रको प्रकाशन ।
२. कर्मचारी व्यवस्थापन मापदण्डका आधारमा कर्मचारीको पदस्थापन र सरुवा हुने व्यवस्था र आधारभूत संगठन संरचनाको निर्माण ।
३. प्रदेश योजना आयोगको गठन र एक वर्षभित्र नै पञ्चवर्षीय योजना निर्माण ।
४. कानुन आयोग र मस्यौदा समितिको गठन र कानुनको निर्माणमा तीव्रता ।
५. आवधिक योजनाका आधारमा वार्षिक नीति तथा कार्यक्रम र मध्यकालीन खर्च संरचना तयार गरी कार्यान्वयनको थालनी ।
६. प्रदेशको नाम लुम्विनी र स्थायी राजधानी राप्ती उपत्यका(देउखुरी) दाङलाई तोक्ने ऐतिहासिक निर्णय गरिएको छ ।
७. कृषि उद्योग र पर्यटनलाई अर्थतन्त्रको विकासको आधारको रुपमा पहिचान गरी त्यसको विकासको योजना र कार्यक्रम निर्माण ।
८. सामाजिक र मानविय विकासका लागि शिक्षा, स्वास्थ र सामाजिक क्षेत्रको विकासको थालनी ।
९. दुईवटा प्रादेशिक अस्पताललाई विशेषज्ञ अस्पताल र १२ वटा जिल्लास्तरीय अस्पतालहरुको क्षमता विस्तार गरी ५० श्ययायाको अस्पतालका रुपमा स्तरोन्नति ।
१०. लमहीमा ट्रमा सेन्टर र चन्द्रौटामा सरुवारोग अस्पतालको निर्माणको थालनी ।
११. चार वटा कोरोना विशेष अस्पतालको निर्माण र सञ्चालन, आइसोलेसन सेन्टर, होल्डिङ सेन्टर र क्वारेन्टिनको व्यवस्थापनमा विशेष भूमिका ।
१२. विश्वविद्यालय स्थापना सम्बन्धि छाता ऐनको निर्माण र बाँकेको खजुरामा विश्वविद्यालय स्थापनाको निर्णय ।
१३. स्मार्ट कृषि गाउँ कार्यक्रम, हरित स्वयमसेवक, करारखेती, कृषिकर्मी रोजगार कार्यक्रम लगायत कृषिक्षेत्रको विकास र रुपान्तरणका योजना तथा कार्यक्रम ।
१४ प्रदेशको विविधता एकै थलोमा प्रदर्शन गर्नेगरी प्रदेश एस्पोको सफल आयोजना ।
१५. आञ्चलिक मनोविज्ञानलाई प्रादेशिक मनोविज्ञानमा रुपान्तरणगरी हामी लुम्बिनीवासीको भावना निर्माण ।
१६. सुस्ता, मर्चवार र नरैनापुरजस्ता सिमावर्ती क्षेत्र र सिमानाकाको विकासमा अग्रसरता ।
१७. रणनीतिक सडक सञ्जालको योजनावद्ध विकास र पालिकाको केन्द्र जोड्ने सडकको निर्माण ।
१८. प्रदेशमा एक करोडभन्दा कम लागतका सवारी साधनको मात्र खरीदको व्यवस्था । मुख्यमन्त्रीका लागि नयाँ गाडी नकिनिएको ।
१९. सुशासन ऐनको निर्माणगरी साधारण खर्च कटौती र विकास खर्चमा पारदर्शीता निर्माण ।
२०. प्रदेशको अधिकांश बजेट ठेक्का व्यवस्थापनका माध्यमवाट कार्यान्वयन ।
२१. एक वर्षमा ४० हजार घरमा धारा जडान गर्न सफल ।
२२. सिंचाई, खानेपानी, तटबन्ध र सडकपुलमा शतप्रतिशतभन्दा बढी बजेट खर्च गर्ने क्षमताको विकास ।
२३. तीन वर्षको छोटो अवधिमा पूँजीगत खर्च शतप्रतिशत गर्न सफल ।
२४. केन्द्र र स्थानीय तहसँगको राम्रो समन्वय र सहकार्य ।
२५. औसतमा प्रत्येक वर्ष २०० किलोमिटर सडक कालोपत्र गर्न सफल ।
२६. आगामी वर्ष झण्डै ८० वटा पुल निर्माण हुने अवस्थाको निर्माण ।
२७. केन्द्रबाट हस्तान्तरित सशर्तका कार्यक्रममा शतप्रतिशतभन्दा बढी बजेट परिचालन गर्न सफल ।
२८. केन्द्रका ठुला र गौरवका आयोजनाको कार्यान्वयनमा सहजीकरण ।
२९. लुम्बिनी प्रदेशको दीर्घकालीन योजनाको आधार तयार ।
३०. ठुला औद्योगिक क्षेत्रका लागि जमिनको सुनिश्चितता ।
३१. तीन महानगर पूर्वाधार विकासको अवधारणा तयार ।
३२. प्रदेश राजधानीको गुरुयोजना निर्माणको प्रकृया आरम्भ ।
३३. दुई वटा प्रादेशिक अस्पततालाई विशिष्टिकृत अस्पतालको रुपमा विकास गर्न गुरुयोजना निर्माण ।
३४. प्रदेश लोकसेवा आयोग गठन भइ कार्य आरम्भ भएको ।
३५. सूचना प्रविधि प्रतिष्ठान गठन भइ डिजिटल प्रदेश निर्माणको थालनी ।
३६. प्रदेश प्रशिक्षण प्रतिष्ठानका माध्यमवाट प्रदेश र स्थानीय तहमा जनशक्ति विकासको थालनी ।
३७. पूर्वाधार विकास प्राधिकरण गठन भइ ठुला विकासका आयोजना अघि वढाइएको ।
३८. पालिकाहरुमा खेल पूर्वाधारको विकास र वहुद्देश्यीय भवनको निर्माण ।
३९. विज्ञान शिक्षामा छात्राको सहभागितमा उल्लेख्य वृद्धि ।
४०. मुस्लिम, दलित र कमैया र कमलहरीका छोरीहरुका लागि उच्चशिक्षामा छात्रवृत्तिको व्यवस्था ।
४१. प्रदेशमा अवस्थित विश्वविद्यालयसँग अनुसन्धानमुलक कार्यमा साझेदारीको थालनी ।
४२. मुख्यमन्त्री ग्रामीण विकास तथा रोजगार कार्यक्रमका माध्यमबाट गरिवी निवारणमा महत्वपूर्ण योगदान ।
४३. राज्यका तीन वटै सुरक्षा निकायसँग कोभिड–१९ महामारी र विपद प्रतिकार्यमा राम्रो सहकार्य र समन्वयको स्थापना ।
४४. जनता आवास कार्यक्रमको कार्यान्वयनमा महत्वपूर्ण उपलब्धी ।
४५. सहरी क्षेत्रमा सडक पेटी निर्माणमा तीव्रता र पर्यटकीय सम्भावना बोकेका क्षेत्रमा पूर्वाधारको विकास ।