सिड्नी । अस्ट्रेलियाको सिड्नी अन्तर्राष्ट्रिय विमानस्थलमा मोबाइल फोन जाँच गर्ने क्रममा बाल यौन दुर्व्यवहारसम्बन्धी सामग्री फेला परेपछि २७ वर्षीय एक युवकविरुद्ध अभियोग लगाइएको छ।
प्रहरीका अनुसार गत नोभेम्बर ८ मा विमानस्थलमा गरिएको मोबाइल फोन परीक्षणका क्रममा उक्त सामग्री फेला परेको थियो। त्यसपछि घटनाबारे थप अनुसन्धान अघि बढाइएको हो।
न्यु साउथ वेल्स (एनएसडब्ल्यू) प्रहरीसँगको सहकार्यमा गरिएको अनुसन्धानका क्रममा दक्षिण–पश्चिम सिड्नीस्थित एक निवासमा खानतलासी गरिएको थियो। सो क्रममा थप विद्युतीय उपकरणहरू बरामद गरी फरेन्सिक परीक्षणका लागि पठाइएको प्रहरीले जनाएको छ।
प्रहरीले बाल यौन दुर्व्यवहारसम्बन्धी सामग्रीलाई पीडितविहीन अपराधका रूपमा हेर्न नमिल्ने स्पष्ट पारेको छ। यस्ता प्रत्येक तस्बिर वा भिडियोको पछाडि दुर्व्यवहार र शोषणमा परेका बालबालिकाको पीडा जोडिएको प्रहरीले जनाएको छ।
प्रहरीले बालबालिकामाथि हुने यौन शोषणसँग सम्बन्धित सामग्रीको उत्पादन, भण्डारण र प्रसार गम्भीर अपराध भएको उल्लेख गर्दै यस्ता गतिविधिविरुद्ध अनुसन्धान र कारबाही जारी रहने जनाएको छ।
आरोपितमाथिको अनुसन्धान जारी रहेकाले अदालतबाट दोषी ठहर नभएसम्म उनलाई निर्दोष मानिने अस्ट्रेलियाली कानुनी सिद्धान्त लागू हुन्छ वकिलहरुको जिकीर छ।
प्रतिक्रिया