प्रधानमन्त्री ओलीद्वारा नेपाली क्रिकेट टोलीलाई बधाई

काठमाडौं, २२ जेठ । प्रधानमन्त्री केपी शर्मा ओलीले आइसिसी विश्वकप लिग–२ एकदिवसीय शृङ्खलामा नेपाल विजयी भएकामा सम्पूर्ण खेलाडीमा हार्दिक बधाई ज्ञापन गरेका छन् ।

गएराति स्कटल्याण्डमा भएको खेलमा नेदरल्याण्ड्सलाई पराजित गर्दै नेपालले आइसिसी विश्वकप लिग–२ एकदिवसीय त्रिकोणात्मक शृङ्खलामा लगातार दोस्रो जित हात पारेकामा प्रधानमन्त्री ओलीले खेलाडीको हौसला बढाउँदै सामाजिक सञ्जालबाट बधाई दिएका हुन् ।

गएराति भएको शृङ्खलाको दोस्रो खेलमा नेपालले नेदरल्याण्ड्सलाई ५ विकेटले पराजित गरेको हो । त्यसअघि शृङ्खलाको पहिलो खेलमा नेपालले स्कटल्याण्डलाई एक विकेटले हराएको थियो ।