असोज ३ गतेसम्म संवैधानिक ढोका बन्द : महासचिव चौधरी

काठमाडौं, २९ भदौ । मधेसी जनअधिकार फोरम लोकतान्त्रिकका महासचिव रामजनम चौधरीले असोज एक गतेसम्मका लागि संवधानिक ढोका बन्द भएको बताउनुभएको छ ।

दैनिक नेपालसँग आज बिहान कुरागर्दै महासचिव चौधरीले असोज तीन गतेपछि फोरम लोकतान्त्रिक नेतृत्वको मोर्चाले थप रणनीति बनाउने बताउनुभयो । ‘वार्ताका लागि हामी तयारै छौँ’, उहाँले भन्नुभयो, ‘तर असोज ३ गते ५ बजेसम्म हाम्रा लागि संवैधानिक बाटो बन्द भएको छ ।’

संविधान निर्माणको प्रक्रिया अगाडि बढीसकेकाले अब आफूहरूले उठाएका माग तत्काल पूरा हुने कुनै सम्भाना नरहेको उहाँले बताउनुभयो ।

‘नयाँ संविधानको प्रक्रिया अगाडि बढी सकेको छ’, उहाँले भन्नुभयो, ‘अब त संविधानको परिमार्जित विधेयकमा कमा र पूर्णविराम पनि फेरबदल गर्न सकिँदैन ।’

महासचिव चौधरीले भावी रणनीतिका विषयमा फोरम लोकतान्त्रिकको नेतृत्वमा रहेको तीन दलीय मोर्चाको बैठकले समीक्षा गरिरहेको बताउनुभयो । उहाँले संविधान निर्माणको प्रक्रियाबाट बाहिर रहे पनि आफूहरू सरकार र प्रमुख तीन दलको सम्पर्कमै रहेको बताउनुभयो ।