सुनसरी र उदयपुरलाई जोड्ने कोसी पुलको प्रधानमन्त्रीद्वारा उद्घाटन

मैनामैनी (उदयपुर), १८ साउन । प्रधानमन्त्री सुशील कोइरालाले सुनसरी र उदयपुरलाई जोड्ने सप्तकोसी नदीमा निर्मित पुलको आज यहाँ आयोजित एक विशेष समारोहमा उद्घाटन गर्नुभयो ।

धरान–चतरा–गाईघाट–कटारी–सिन्धुली–हेटौँडा सडक खण्डअन्तर्गत उदयपुरको मैनामैनी गाविस र सुनसरीको बराह क्षेत्र गाविसमा उक्त पुल निर्माण गरिएको हो ।

एसियाली विकास बैंक (एडिबी)को अनुदान तथा नेपाल सरकारद्वारा संयुक्त रुपमा लगानी भएको उक्त पुल रु ७६ करोड ११ लाख १३ हजार ५०१ मा निर्माण सम्पन्न भएको हो ।

बाढीजन्य क्षति पुनःनिर्माण आयोजनाअन्तर्गत निर्मित उक्त पुलमा एडिबीको ६० र नेपाल सरकारको ४० प्रतिशत लगानी भएको छ । दुई सय ६१.३ मिटर लामो र १०.५ मिटर चौडा उक्त पुल पाँच वर्षअघि निर्माण सुरु भएको र निर्धारित समयमै पूरा भएको हो । रासस