कास्की, ९ चैत । नेपाली सेनाको सहायक सेनानी हुँ भन्दै हिँड्ने नक्कली सहायक सेनानी पक्राउ परेका छन् ।
मुस्ताङको थासाङ गाउँपालिका–४ का १८ वर्षीय किशोर पोखरा महानगरपालिका–१४ चाउथेबाट शनिबार पक्राउ परेका हुन् ।
सोही ठाउँस्थित निर्माणाधीन पोखरा अन्तर्राष्ट्रिय बिमानस्थलमा प्रवेश गरी शंकास्पद हर्कत गरेपछि त्यहाँ खटिएको नेपाली सेनाको टोलीले जाँच गर्दा निज नेपाली सेनामा कार्यरत नभएको पाइएकाले उनलाई तत्काल नियन्त्रणमा लिईएको बताइएको छ ।
आवश्यक अनुसन्धान तथा कारबाहीका लागि प्रतिवेदन सहित हाल उनलाई जिल्ला प्रहरी कार्यालय कास्कीमा बुझाएको छ । उनको साथबाट नेपाली सेनाको सहायक सेनानी दर्जाको दर्ज्यानी चिह्नसहित पोसाक (चुस्ता), बुट, श्री भगवतीदल गण पोखरा लेखिएको परिचयपत्र १ थान, फ्लाईरोज लेखिएको कालो रंगको नक्कली वाकिटकी रेडियो सेट १ थान, १ थान मोबाइल र रमेश श्रेष्ठको नामको नेपाली नागरिकताको प्रतिलिपि १ थान बरामद भएको छ ।
उनी उपर लिखत सम्बन्धी कसूर अन्तर्गत जिल्ला अदालत कास्कीबाट ७ दिन म्याद थप भई थप अनुसन्धान भइरहेको जिल्ला प्रहरी कार्यालय कास्कीले जनाएको छ ।
प्रतिक्रिया