मेरो ज्यान खतरामा छ, तलमाथि भइहाले अनौठो नमाने हुन्छ: प्रधानमन्त्री ओली

काठमाडौँ, १७ फागुन । प्रधानमन्त्री केपी शर्मा ओलीले आफ्नो ज्यान नै खतरामा रहेको बताएका छन् ।

सोमबार पोखरामा आयोजित नेकपा ओली पक्षीय गण्डकी प्रदेशस्तरीय भेलालाई सम्बोधन गर्दै ओलीले सरकारले विकासका कार्य तीव्र गतिमा गरिरहेकाले देशी विदेशी तत्वहरुले नेकपाल ध्वस्त पार्न लागिरहेको र आफूमाथि पनि खतार रहेको बताए ।

सम्बोधनका क्रममा, ‘यस पार्टीको नेतृत्वमा रहेका हुनाले, यस पार्टीलाई अघि बढाइरहेको हुनाले, सरकार प्रभावकारी र गतिशील ढंगले सञ्चालन गरिरहेको हुनाले, विकास निर्माणको कामहरूले गति लिइरहेको हुनाले ममाथि प्रहार केन्द्रीत छ’, ओलीले भने, ‘तपाईंहरु अनौठो नमान्नु होला यदि ममाथि कुनै शारीरिक हमला नै भयो वा मेरो ज्यान तलमाथि भइहाल्यो भनेपनि कुनै अनौठो नमान्नु होला । तर, त्यस्तो हुन दिइने छैन हामी सतर्कता अपनाउँछौँ ।’

प्रधानमन्त्री ओलीले आफू नरहे पनि पार्टी तलमाथि नपर्ने बताए । ‘म नरहेपनि केही छैन । आन्दोलन छ, पार्टी छ, यस आन्दोलनले प्रतिक्रियावादी तत्वका मतियारहरुसँग घुँडा टेक्नु हुँदैन’, ओलीले भने, ‘देशको भविष्य अन्धकारमा जान दिन हुँदैन । यस पार्टीलाई तलमाथि पर्न दिन हुँदैन ।’