काठमाडौँ, १२ चैत । नेकपा (एमाले) का केन्द्रीय नेताहरुको कार्यविभाजनको अन्तिम सूची आज साँझसम्ममा सार्वजनिक हुने भएको छ ।
गए राति पार्टी अध्यक्ष केपी शर्मा ओलीको निवास भक्तपुर बालकोटमा सम्पन्न स्थायी कमिटीको बैठकले महासचिव ईश्वर पोखरेलले संशोधनसहित प्रस्तुत गरेको कार्यविभाजनको प्रस्तावबारे लगभग टुङ्गो लगाइसकेको भए पनि केही असन्तुष्टि हटाई सो सूची सार्वजनिक हुने छ ।
एमाले केन्द्रीय सदस्य सूर्य थापाका अनुसार आज साँझसम्ममा आधिकारिक रुपमा सो सूची सार्वजनिक गर्ने तयारी भएको बताउनुभयो ।
अध्यक्ष ओलीले वरिष्ठ नेता झलनाथ खनाल र अर्का नेता माधवकुमार नेपालसँग थप परामर्श गरी सूचीलाई अन्तिम रुप दिने बुधबारको स्थायी कमिटीले तय गरेको थियो । बैठकमा केही नेताले कार्यविभाजनको आधार र मापदण्डलाई पद्धतिसङ्गत बनाउन जोड दिनुभएको थियो । नेता नेपाल पार्टी कार्यालय बाहिर हुने औपचारिक बैठकमा अनुपस्थित रहँदै आउनुभएको छ ।
परामर्श अपुग भएमा खनाल र नेपालको विभागीय जिम्मेवारी हाल खाली राखिने सम्भावना छ । गत असारमा सम्पन्न पार्टीको नवाँंै महाधिवेशनपछि केन्द्रीय नेता र सदस्यको कार्यविभाजन हुन सकेको थिएन । रासस
प्रतिक्रिया