खुल्यो विमानस्थल, धावनमार्गबाट यसरी पन्छाइयो टर्किस विमानलाई (फोटोफिचर सहित)

काठमाडौं, २३ फागुन । चारदिन देखि अवरुद्ध त्रिभुवन अन्तर्राष्ट्रिय विमानस्थल शनिवार रातिदेखि सञ्चालनमा आएको छ ।

बुधबारदेखि त्रिभुवन अन्तर्राष्ट्रिय विमानस्थलको धावनमार्गमा अड्किएको टर्किस एयरलाइन्सको विमान शनिवार साँझदेखि ट्रयाकमा आएपछि विमानस्थल सूचारु भएको हो ।

उडान परीक्षण भइसकेको र नियमित उडान सूचारुको तयारी भइरहेको नेपाल नागरिक उड्ययन प्राधिकरणका महानिर्देशक रतिस चन्द्रलाल सुमनले जानकारी दिनुभयो । उहाँका अनुसार टर्किस बिमानलाई धावनमार्गबाट तानेर पार्किङ क्षेत्रमा पुर्‍याएपछि बिमानस्थल सेवा सुचारु भएको हो ।

विमानस्थलका अनुसार आजसम्म २४ हजार ३०० यात्रु तयारी अवस्थामा छन् भने त्यत्तिकै सङ्ख्यामा विभिन्न मुलुकका विमानस्थलबाट यात्रुहरु काठमाडौँ आउने तयारीमा छन् ।

नागरिक उड्डयन प्राधिकरणका महानिर्देशक रतिशचन्द्रलाल सुमनले विमानस्थल अवरुद्ध हुँदा बढेको यात्रुको चापलाई व्यवस्थित र सहज बनाउन विमानस्थल सञ्चालनमा आएपछि २४ सै घन्टा खुला गर्न लागिएको बताउनुभयो ।

उहाँले अवरुद्ध बनेको दिनसम्मको अवधि २४ सै घन्टा खुलाउने र सञ्चालन समयपछिका उडान नियमित हुने तर त्यसअघिका उडान डिले हुने जानकारी दिनुभयो ।

यसअघि विमानस्थल बेलुका ६ बजेसम्मका लागि बन्द गरिएको थियो । टर्किस विमानलाई प्राविधिकहरुले धावनमार्गबाट हटाएपछि उडान सेवा सूचारु भएको हो ।

यस्तै, विमानस्थलले चारदिनसम्म २४ सै घण्टा सेवा सूचारु राख्ने जनाएको छ । यात्रुको चापलाई मध्यनजर गर्दै विमानस्थले यस्तो सेवा दिने तयारी थालेको छ ।

चारदिनदेखि विमानस्थल बन्द हुँदा देशविदेशमा अलपत्र परेका हजारौं नागरिक गन्तव्यमा लाग्ने तयारीमा छन् । 

– विमान उडानको पर्खाईमा बसेका यात्रुहरु ।