सुनिताले नचाइन् देव गुरुङ

चौतारीमा वर,
कहाँ होला थाहा छैन् लमजुङ मेरो घर…

जब यस्तै यस्तै गीत घन्किए, तब नेकपाका प्रमुख सचेतक एवं लमजुङका संघीय सांसद देवप्रसाद गुरुङ पनि नाच्न कस्सिए । प्रसंग हो, लमजुङ कलाकार संघको बार्षिक साधारण सभाको । लमजुङे गायिका सुनिता अधिकारीले ‘मेरो लमजुङ घर…’ बोलको गीतसँगै कार्यक्रमका प्रमुख अतिथि रहेका सांसद गुरुङसँगै सिभिल बैंकका सिइओ एवं गायक गोविन्द गुरुङ लगायत छमछमी नाचे ।

कार्यक्रममा लमजुङका पुराना गायक कृष्णसुधा ढुंगाना, राजु परियारले विगतलाई सम्झँदै पुराना कोसेलीहरु पस्केका थिए । यसैगरी, लमजुङका उदाउँदा कलाकारहरु शर्मिला थापा, प्रकाश न्यौपाने, रमेश परियार, विवेक धितालको बेजोड प्रस्तुति थियो ।

लमजुङ कलाकार संघले साधारण सभाको अवसर पारेर लमजुङमा जन्मेर देशमा छुट्टै पहिचान बनाउन सफल छ जना गायक तथा निर्देशकलाई सम्मान गरेको थियो । .सम्मानित हुनेमा चर्चित लोकगायक तथा गायिकाहरु कृष्णसुधा ढुंगाना, बिमाकुमारी दुरा, कृष्ण गुरुङ र राजु परियार रहेका छन् ।

यसैगरी, गुरुङ चलचित्र तथा राष्ट्रिय गीतबाट करिअर सुरु गरी सिभिल बैंक लिमिटेडको प्रमुख कार्यकारी बन्न सफल गायक तथा सर्जक गोविन्द गुरुङ र ‘भाग्यले बाँचेकाहरु’ वृत्तचित्र फिल्ममार्फत संसारभर अवार्ड जित्न सफल निर्देशक गणेश पाण्डेलाई पनि नेपाल कम्युनिष्ट पार्टीका प्रमुख सचेतक एवं लमजुङका संघीय सांसद देवप्रसाद गुरुङ र लमजुङ कलाकार संघका अध्यक्ष सुवास कुँवरले दोसल्ला र सम्मानपत्रसहित सम्मान गरेका थिए ।