गणेशस्थान क्षेत्रलाई धामका रुपमा विकास गरिने

चितवन, २१ कात्तिक  । भरतपुर महानगरपालिका–११ मा रहेको धार्मिक एवम् ऐतिहासिकस्थल गणेशस्थान क्षेत्रलाई गणेश धामको रुपमा विकास गरिने भएको छ । त्यसको लागि रु ८० करोड खर्च गरिने लक्ष्य राखिएको छ ।

भरतपुरको मुख्य बजार नजिकको सो स्थललाई धार्मिकस्थल र पार्कका रुपमा विकास गरिने भएको हो । गणेशस्थान मन्दिर क्षेत्रको धार्मिक वन २.४३ हेक्टर छ । नवजागृति सामुदायिक वन र जलदेवी सामुदायिक वन क्षेत्रसँग सहकार्य गरी थप ३० हेक्टर क्षेत्रफलमा यसको विस्तार गर्ने योजना अघि बढाइएको छ ।

सो क्षेत्रका प्रदेशसभा सदस्य विजय सुवेदीले नमूना क्षेत्रको रुपमा गणेशस्थानलाई विकास गरिने बताउनुभयो । निजी क्षेत्रसँग सहकार्य गरेर काम गर्न लागिएको उहाँको भनाइ छ । त्यसको लागि प्रदेश सरकारले चालु आवमा रु ८० लाख विनियोजन गरिसकेको छ । स्थानीय निकाय, प्रदेश सरकार, जनसहभागिता र निजी क्षेत्रको सहयोगमा गणेशस्थानलाई धामको रुपमा विकास गरिने बताइएको छ । गणेशस्थान क्षेत्रलाई धामको रुपमा विकास गर्न विस्तृत अध्ययन प्रतिवेदन (डिपिआर) बनाउने काम शुरु गरिएको उहाँले बताउनुभयो ।

साना–साना योजनाले मन्दिरको विकास गर्न नसकिने भएकाले बृहत् योजना अघि सारिएको प्रदेशसभा सदस्य सुवेदीले बताउनुभयो । गणेशधाम डिपिआर अनुसारको काम सम्पन्न गर्न करिब रु ८० करोड लाग्ने अनुमान गरिएको छ । विस्तृत अध्ययनमा सो क्षेत्रमा विभिन्न मन्दिर, जलविनायक, शिव पार्वतीको मूर्ति, सामुदायिक वन क्षेत्रमा २५ बिगाहा क्षेत्रफलमा तलाउ, पार्कलगायतका संरचना निर्माण हुने छन् ।

गणेशस्थान मन्दिर संरक्षण तथा संवद्र्धन समितिका अध्यक्ष दिनेशकुमार चुकेका अनुसार करिब ३० फिट अग्लो गणेशको मूर्ति बनाइनेछ । ठूलो तलाउमा जलविनायक गणेशसँगै नजिकै डाँडामा कैलाश पर्वतको रुवपमा शिव, पार्वती, कुमार र गणेशको आकर्षक मूर्ति निर्माण गरिनेछ । मूर्तिहरूसहितको तस्वीर लिन सकिने गरिने गुरुयोजना निर्माण गरिदैछ ।

तलाउको वरिपरी पाँच किलोमिटरको प्यारापिट बनाइँदैछ जसमा दौडिन र साइकल चलाउन सकिनेछ । आकर्षक खालका झोलुङ्गे पुलबाट दृश्यावलोकन गर्न सकिने व्यवस्था गरिनेछ । तलाउको छेउमा हात्ती, जरायो जस्ता जनावरका झुण्डका मूर्तिहरू पनि निर्माण गरिने छ । तलाउमा डुँगा सयरको व्यवस्था गरिनेछ । यसअघि २०६४ सालयता सो क्षेत्रमा रु ८० लाख खर्चेर दुई वटा सभाहल, शौचालय, मठमन्दिरको जिर्णाेद्वार गरिएको चुकेले बताउनुभयो ।

सो क्षेत्रमा हाल गणेश, कमलेश्वर, सन्तोषीमाता, पशुपति, मनकामना, चन्द्रेश्वरी, सरस्वती र विश्वकर्माका मन्दिर रहेका छन् । गणेशधाम चितवनको अर्को महत्वपूर्ण धार्मिक पर्यटकीय गन्तव्यको रुपमा विकास हुने उहाँले बताउनुभयो । धामलाई चितवन र नवलपरासीका विभिन्न धार्मिक पर्यटकीय स्थलहरूसँग जोडेर एकीकृत विकास गर्ने योजना छ ।

गणेशस्थान भरतपुर महानगरपालिकाको सबैभन्दा पुरानो ऐतिहासिक तथा धार्मिक स्थल हो । पौराणिक कालमा पाल्पा राज्यका प्रतापी राजा मणिमुकुन्द सेनको राज्यकालमा बनेको ऐतिहासिक इनारसमेत यस स्थानमा रहेकाले तत्कालीन अवस्थादेखि नै धार्मिक थलोको रुपमा स्थापित भएको स्थानीयको भनाइ छ । -रासस