काठमाडौं । नेकपा एमालेका अध्यक्ष झलनाथ खनालले नेपालको कम्युनिस्ट आन्दोलनको मूल प्रवाह एमाले नै भएको आफ्नो दश दिने चीन भ्रमणबाट पुनः पुष्टि भएको बताउनुभएको छ ।
नेता मदन भण्डारी र जीवराज आश्रितको स्मृति दिवसका अवसरमा शनिबार पार्टी केन्द्रीय कार्यालय, बल्खुमा आयोजित कार्यक्रममा अध्यक्ष खनालले चीनले आफ्नो भ्रमण टोलीलाई दिएको महत्व र त्यहाँका उच्च नेतासँगको भेटमा पाइएको बुझाइका आधारमा पनि नेपालमा एमाले नै कम्युनिस्ट आन्दोलनको अगुवा र मूल प्रवाह भएको पुनः पुष्टि भएको दाबी गर्नुभयो ।
उहाँले चीन भ्रमणका क्रममा दुई देशबीचका सम्बन्ध विस्तार हुनाका साथै एमाले र चिनियाँ कम्युनिस्ट पार्टीबीचको सम्बन्धमा पनि नयाँ आयाम थपिएको स्पष्ट गर्नुभयो । अर्काे एक सन्दर्भमा उहाँले पार्टीको आगामी असार १९ गतेदेखि काठमाडौँमा हुने नवौँ महाधिवेशन साङ्गठनिक, वैचारिक र सबै हिसाबले एकताबद्ध हुने विश्वास व्यक्त गर्नुभयो ।
उहाँले एक वर्षभित्र संविधान जारी गराउने पार्टीको प्रतिबद्धतामा लाग्न सभासद् र कार्यकर्तालाई अपिल पनि गर्नुभयो । कार्यक्रममा मदन भण्डारीका सङ्कलित रचना समेटिएका विभिन्न पाँच पुस्तक सार्वजनिक गरिएको थियो ।
यस्तै भण्डारीका पुस्तक प्रकाशनमा महत्वपूर्ण भूमिका निर्वाह गर्नुहुने एमाले प्रचार विभागका सचिव सूर्य थापालाई पनि सम्मान गरिएको थियो । मदन–आश्रित स्मृति प्रतिष्ठानका अध्यक्ष प्रदीप नेपालले प्रकाशित पुस्तकले भण्डारीको वैचारिक व्यक्तित्व बुझ्न थप मद्दत मिल्ने बताउनुभयो ।
यस्तै स्मृति दिवसका अवसरमा नेकपा एमाले केन्द्रीय स्वास्थ्य तथा जनसङ्ख्या विभागले पार्टी कार्यालयमा बिहान रक्तदान कार्यक्रम आयोजना गरेको थियो ।
भण्डारी र आश्रितको दासढुङ्गा जिप दुर्घटनामा परी २०५० साल जेठ ३ गते निधन भएको थियो ।
प्रतिक्रिया