संघीयताको नाममा देशलाई बिगार्ने काम भयो : अध्यक्ष ओली

काठमाडौं, २० मंसिर । प्रमुख विपक्षी एमाले अध्यक्ष केपी ओलीले सरकारले राखेको संविधान संशोधन प्रस्तावमा समर्थन गर्न नसकिने स्पष्ट पारेका छन् ।

बरू उनले प्रधानमन्त्री पुष्पकमल दाहाललाई संशोधन प्रस्ताव फिर्ता लिन सुझाव दिएका छन् । नागरिक दैनिकले समाचार छापेको छ ।

‘मेरो जुत्ताको तलुवा जहाँ टेक्यो, त्यहाँ चिप्लिने खालको छैन’, पूर्वप्रधानमन्त्री ओलीले आइतबार साँझ सम्पादकसहितका पत्रकारसँग भने, ‘यो देश बनेको पनि कसैले भोट हालेर होइन ।’

कतिपय बेलामा भोट हालेका कारण देश समाप्त भएर गएको तर्क पनि उनले अघि सारेका छन् ।

ओलीले संघीयताकै कारण रूस टुक्रा टुक्रा भएको सन्दर्भसमेत प्रस्तुत गरेका थिए । ‘अहिले संघीयताको नाममा देशलाई बिगार्ने काम भएको छ’, उनले भने, ‘देश केक होइन टुक्रा टुक्रा पारेर बाँड्न ।’