सहिद सप्ताहको अवसर पारेर आरआरमा अखिल क्रान्तिकारीको रक्तदान

काठमाडौं, १९ फागुन । सहिद सप्ताहको अवसर पारेर रत्न राज्यलक्ष्मी क्याम्पस (आरआर)मा रक्तदान कार्यक्रमको आयोजना गरिएको छ ।

वैद्य नेतृत्वको क्रान्तिकारी माओवादीको विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) आरआर ईकाइ समितिले मंगलबार सहिद सप्ताह विशेष रक्तदान कार्यक्रम आयोजना गरेको हो ।

उक्त कार्यक्रममा ५४ जनाले रक्तदान गरेको आरआर ईकाइ अध्यक्ष विपिन अधिकारीले जानकारी दिए ।

उनले भने– ‘ब्लड बैंकमा रगत आवश्यक परेको रहेछ । भूकम्पपछि रगतको एकदमै अभाव रहेछ । त्यसलाई सहयोग गर्न र मानवताको नाताले अरुको ज्यान बचाउन कार्यक्रमको आयोजना गर्यौ । विद्यार्थी साथी भाईहरुले उत्साहका साथ रक्तदान गरे ।’

रक्तदान कार्यक्रमको अखिल (क्रान्तिकारी)का केन्द्रीय अध्यक्ष तथा पार्टीका केन्द्रीय सदस्य रत्न ढकालले उदघाटन गरेका थिए भने केन्द्रीय सचिव मिलन एमसीको पनि सहभागिता थियो ।

रक्तदान गर्नेलाई अखिलले सम्मान स्वरुप प्रमाणपत्र प्रदान गरेको थियो । वर्षेनी रक्तदान कार्यक्रमको आयोजना गर्ने अखिलले गत वर्षपनि धुमधामका साथ रक्तदान कार्यक्रम सम्पन्न गरेको थियो ।