सरकार प्रतिफल दिनसक्ने खालका आयोजनाको खोजीमा : मन्त्री दाहाल

काठमाडौं, ३१ जेठ । भौतिक पूर्वाधार तथा यातायातमन्त्री देवेन्द्र दाहालले प्रतिफल पनि दिनसक्ने खालको आयोजनाको खोजी भइरहेको बताएका छन् ।

शनिबार काठमाडौंमा आयोजित ‘दोलालघाट–चर्नावती सुरुङ्ग मार्ग निर्माण’ विषयक अन्तरक्रिया कार्यक्रममा बोल्दै उनले प्रतिफल आउने खालको सडक आयोजनाको अध्ययन मन्त्रालयले गरिरहेको बताएका हुन् ।

उनले भने, ‘आयोजनाहरु अगाडि बढाउँदा जनताको घनाबस्ती भएको ठाउँ धेरै जनतालाई प्रभाव पार्ने ठाउँलाई प्राथमिकता दिन्छौँ । यस्ता आयोजनाहरुको पनि खोजी गरिरहेको छौँ । जुन आयोजनाले प्रतिफल पनि दिन सकोस् । ३०–४० वर्ष लाग्न सक्छ । त्यसको रिटर्न त आउनुपर्‍यो नि । प्रतिफल आउने खालको आयोजना सडकमा हुन्छ भने त्यसको अध्ययन पनि हामीले गरिरहेको छौँ ।’

त्यस्तै, उनले दोलालघाट चर्नावती सुरुङ्ग मार्ग निर्माणको विषयमा विभिन्न समस्या र चुनौतीहरु देखिएको भन्दै त्यसलाई पार गर्दै अगाडि बढ्नुपर्ने बताए । चर्नावती सुरुङ्ग मार्ग निर्माण दोलखाली जनताहरुको साझा अवधारणा बनेको भन्दै उनले खुसी व्यक्त गरे ।

उनले भने, ‘दोलालघाट चर्नावती सुरुङ्ग मार्ग निर्माणको विषयमा भएका समस्याहरु चुनौतीहरुलाई पार गर्दै अगाडि बढ्नुपर्छ । अब राजनीतिलाई विकाससँग पनि जोड्नुपर्छ भनेको थियौँ । त्यसको सुरुवात भएको जस्तो महशुस भएको छ । सुरुङ्ग मार्ग निर्माण दोलखाली जनताहरुको साझा अवधारणा बनेकोमा खुसी लागेको छ,’ उनले भने

मन्त्री दाहालले अन्य विकासित देशहरुमा जनताको चासोले नै विकास सम्भव भएको भन्दै विकास निर्माणमा गहिरो चासो जनताले राख्यो भने देश छिट्टै अगाडि बढ्न सक्ने धारणा राखे । उनले देशमा केही भएको छैन् भन्ने गलत भाष्य निर्माण भएको भन्दै त्यसलाई चिर्न आवश्यक रहेको पनि बताए ।