पोखरा, ३० चैत । नेकपा (एमाले)ले आज गण्डकी प्रदेशको राजधानी पोखरामा बृहत् जागरणसभा गर्दैछ । एमाले कास्की जिल्ला कमिटीको आयोजनामा चिप्लेढुंगामा जागरणसभा हुन लागेको हो ।
लोकतान्त्रिक गणतन्त्र र संविधानको रक्षा तथा प्रतिगामी षड्यन्त्रविरुद्ध एमालेले चिप्लेढुंगामा जागरणसभाको आयोजना गरेको हो । जागरणसभालाई एमाले वरिष्ठ उपाध्यक्ष ईश्वर पोखरेलले विशेष सम्बोधन गर्नेछन् ।
जागरणसभाको तयारी पूरा भएको एमाले कास्कीका अध्यक्ष बैनबहादुर अधिकारी क्षेत्रीले जानकारी दिए । सभाअघि ३ ठाउँबाट बृहत् र्याली निकालिने उनले बताए ।
उनका अनुसार सभागृहचोक, नदीपुर, रानीपौवाबाट र्याली निकालिने र र्याली चिप्लेढुंगा पुगेर सभामा मिसिनेछ । रानीपौवाबाट सुरू हुने र्यालीमा रूपा गाउँपलिका, मादी गाउँपालिका, पोखरा–१०, १२, १३, १४, १५, २०, २६, २७, २८, २९, ३०, ३१, ३१ को टोली सहभागी हुनेछन् । सभागृहको र्यालीमा पोखरा–५, ६, ७, ८, ९, १७, २१, २२, २३, ३३ र पोखरा–१८ र २४ को तल्लो भाग, नदीपुरमा अन्नपूर्ण गाउँपालिका, माछापुच्छ्रे गाउँपालिका, पोखरा–१, २, ३, ४, १६, १९, २५ र पोखरा–१८ र २४ को तल्लो भागको टोली सहभागी हुनेछ ।
जागरणसभामा कास्कीसहित तनहुँ, पर्वत, स्याङ्जालगायत जिल्लाबाट पनि सहभागिता रहनेछ ।
प्रतिक्रिया