वैदेशिक रोजगारीको क्षेत्र व्यवस्थापनमा सबैको प्राथमिकता हुनुपर्छ : मन्त्री श्रेष्ठ

दैनिक नेपाल २०७८ पुष ३० गते ९:१०

पोखरा, ३० पुस । श्रम रोजगार तथा सामाजिक सुरक्षामन्त्री कृष्णकुमार श्रेष्ठले सुरक्षित वैदेशिक रोजगारीका लागि संघीय सरकारले स्थानीय र प्रदेश सरकारसँग सहकार्य गर्ने बताएका छन् ।

सुरक्षित आप्रवासन (सामी) परियोजना तेस्रो चरणको प्रगति समीक्षा तथा भावी कार्ययोजनाबारे हिजो बिहीबार पोखरामा आयोजित छलफल कार्यक्रममा मन्त्री श्रेष्ठले सुरक्षित वैदेशिक रोजगारीको बिषय साझा सरोकारको विषय भएकाले संघीय सरकारले स्थानीय तथा प्रदेश सरकारसँग निरन्तर समन्वय तथा सहकार्य गर्दै जाने बताएका हुन् ।

मन्त्री श्रेष्ठले वैदेशिक रोजगारबाट प्राप्त विप्रेषणले देशको अर्थतन्त्रलाई चलायमान बनाएको भए पनि यसका नकारात्मक पक्ष तथा चुनौतीहरू रहेको चर्चा गर्दै चुनौतीहरुलाई सम्बोधन गर्न स्थानीय सरकार, प्रदेश सरकार तथा संघीय सरकारबीच नीतिगत परिवर्तन, लागत साझेदारी, प्रभावकारी कार्यान्वयन र समस्याको दीगो समाधानका लागि समन्वय तथा सहकार्य हुनु आवश्यक रहेको बताएका छन् ।

सरकारको प्राथमिकता आन्तरिक रोजगारीको क्षेत्र प्रवर्द्धन गर्दै बाध्यकारी वैदेशिक रोजगारलाई अन्त्य गर्ने भए पनि वैदेशिक रोजगारको क्षेत्र व्यवस्थापन गर्नु सबैको प्राथमिकता हुनुपर्ने उनको भनाइ छ ।

वैदेशिक रोजगारलाई सुरक्षित, मर्यादित एवम् शोषणरहित बनाउन नेपाल सरकार र स्विट्जरल्याण्ड सरकारबीच भएको द्विपक्षीय सम्झौताअनुरुप सुरक्षित आप्रवासन (सामी) परियोजना सञ्चालनमा रहेको छ । जसको नीतिगत अगुवाई श्रम, रोजगार तथा सामाजिक सुरक्षा मन्त्रालयले गरेको छ भने प्रदेश सरकारले समन्वय र अनुगमनको भूमिका निर्बाह गर्दै आएको छ ।

साथै स्थानीय सरकारहरुको नेतृत्वमा यो परियोजना कार्यान्वयनमा छ । परियोजनाले ४ लाख ५१ हजार जनालाई सुरक्षित वैदेशिक रोजगारसम्बन्धी सूचना प्रदान गरेको, १३ हजार १७७ जनालाई निःशुल्क कानुनी सहायता, वैदेशिक रोजगारको कारण मनोसामाजिक समस्या न्यूनीकरणका लागि २३ हजार ४१७ जनालाई मनोसामाजिक परामर्श सेवा, वित्तीय साक्षरता २१ हजार २७ जनालाई साथै निःशुल्क सीप तालिम ३ हजार ३५१ जनालाई प्रदान गरेको जनाएको छ ।