जिके पोख्रेलको कथासङ्ग्रह ‘गोहो’ सार्वजनिक

काठमाडाैँ,  २४ चैत । कथाकार जिके पोख्रेलको कथा संग्रह ‘गोहो’ सार्वजनिक भएको छ । सर्वनाम थिएटरमा समीक्षकद्वय महेश पौड्याल, राजिन पनेरु र कथाकार पोख्रेलले संयुक्त रूपमा ‘गोहो’ सार्वजनिक गरे । ‘गोहो’मा नेपालको जनयुद्ध कालकाे दशवर्षे राजनीतिक र सामाजिक सङ्क्रमणको पृष्ठभूमिमा लेखिएका कथाहरू समावेश रहेका छन्।

परिचर्चामा सहभागी समालोचक महेश पौड्यलाले जिकेका कथा राजनैतिक र सामाजिक विषयवस्तुमा आधारित भएर पनि तटस्थ रहेको बताए । जनयुद्ध र संक्रमणको समयलाई पर्खेर, हेरेर तथा परख गरेक करिब एक दशकपछिमात्रै कथा लेखेकोले यो सम्भव भएको उनको टिप्पणी थियो ।

‘जिकेका कथाले लैङ्गिक समानताको हकमा चलनचलतीका एकाङ्गी दृष्टिकोण सञ्याउन, स्वतन्त्रता र स्वच्छन्दाबीचको विभेदबारे चिन्तन गर्न तथा प्रेम र विवाहका हार्दिक तथा बाध्यात्मक पक्षबीचको बैषम्यबारे मनन गर्न अभिप्रेरित गर्दछन्’ उनले भने ।

अर्को वक्ता राजिन पनेरुले पोख्रेलको पुस्तकले नेपाली समाजकाे निकट विगतकाे ठूला सकसकाे कथा बोकेको बताए  । नेपाली माटोको कथालाई जीवन्त रूपमा देखाएकाे हुनाले हरेकले पढ्नै पर्ने उनको कथन छ ।

‘कथा भित्र बिम्बात्मक विषयवस्तु शक्तिशाली रूपमा प्रयोग भएको कुरामा उनकाे जिकिर थियाे । ‘बिम्बले अव्यक्त चिजलाई व्यक्त गर्छ। आकारमा सानो, अर्थमा ठूलो आम मानिसको एक जीवन्त कथा रहेको छ’, पनेरूले भने ।

कथाकार पोख्रेलकाे दश वर्षे जनयुद्धको उठानदेखि बैठानसम्मको पृष्ठभूमिमा रहेर आफूले कथा लेखेको कथन थियाे । अहिले अर्को कुनै पक्ष पुनः भूमिगत हुने अवस्था आएको भन्दै कथामा लेखिएका घटनाहरू यथार्थपरक रहेको बताए। उनले ‘गोहो’भित्र रहेका घटना, पात्रसँग आफू पनि कहीकही जोडिएको स्वीकार गर्दै जनयुद्धलाई चियाउने एउटा सुन्दर आँखीझ्याल हुनेमा विश्वस व्यक्त गरे।

पोख्रेलको यसअघि दुईवटा कथा संग्रह जून निदाएकाे रात (२०६९) र स्वभिमानकाे चिता (२०७२) सार्वजनिक भइसकेका छन्। दशवटा कथा समावेश रहेको गोहो अक्षर~शालाले प्रकाशन गरेको हो।