पाँचथर, २४ असार । भाषाविद् तेजमान आङदेम्बेको निधन भएको छ । उहाँको पाँचथर जिल्लाको लुम्फावुङ–३ काफलबोटेस्थित घरमा बिहीबार बेलुका ५ बजे निधन भएको हो ।
लुम्फावुङ उच्च माविमा अध्यापनरत ५१ वर्षीय आङदेम्बेले अङ्ग्रेजी, नेपाली र लिम्बू भाषामा दक्षता हासिल गर्नुभएको थियो ।
लिम्बू साहित्य र मुन्धुमका समेत जानकार उहाँको घरैमा निधन भएको सोही विद्यालयका शिक्षक नरेन्द्र शेर्माले जानकारी दिनुभयो ।
केही समयदेखि कमलपित्त (जन्डिस)को बिरामी उहाँको सामान्य अवस्थामा रहेकोमा परिवारका सदस्यहरुसँग कुराकानी गर्दागर्दै अचानक देहान्त भएको शेर्माले बताउनुभयो ।
आङदेम्बेले त्रिभुवन विश्वविवद्यालय केन्द्रीय क्याम्पस, धरान क्याम्पस र पाँचथर बहुमुखी क्याम्पसमा समेत अध्यापन गराइसक्नुभएको थियो । रासस
प्रतिक्रिया