मधेसी मोर्चा फुटको संघारमा, यादव, ठाकुर र महतोबीच कुरै हुन छाड्यो

काठमाडौं, १७ पुस । विगत चार महिनादेखि जारी मधेस आन्दोलन आन्तरिक गुट र चरम असन्तुष्टिका बीच गुज्रिएको रहस्य खुलेको छ ।

संयुक्त लोकतान्त्रिक मधेसी मोर्चाको आन्दोलनमा रहेका चार वटा दल चारतिर विभाजित रहेको खेलेको हो ।

विशेष गरेर संघीय समाजवादी फोरम नेपालका अध्यक्ष उपेन्द्र यादव र तराई मधेस लोकतान्त्रिक पार्टीका अध्यक्ष महन्थ ठाकुर एकातिर छन् । सद्भावना पार्टीका अध्यक्ष राजेन्द्र महतो अर्को कित्तामा छन् ।

यादव र ठाकुरले मधेस आन्दोलन आ–आफूले चलाएको भ्रम पालेर बसेका छन् । महेन्द्र राय यादव पनि तीन शीर्ष नेताहरूसँग असन्तुष्ट छन् । आफ्नो दललाई सानो भनेर हप्ने गरेको भन्दै रायले असन्तुष्टि जनाउने गरेका हुन् ।

मधेस आन्दोलनको नेतृत्व आफूले गरेको भ्रम सद्भावना पार्टीका अध्यक्ष महतोलाई पनि परेको छ । हुन पनि अहिलेको आन्दोलन राजेन्द्र महतोले मात्रै हाँकेका हुन् की भन्नेहरू पनि कम छैनन् ।

यस पटकको मधेस आन्दोलनमा राजेन्द्र महतोको अलि धेरै सक्रियता देखिएको छ । महतो आफै वीरगञ्ज नाकामा धर्ना बसेर आन्दोलनलाई शसक्त बनाउने प्रयास गरेपछि उनको उचाइँ बढेको राजनीतिक विश्लेषकहरूले बताएका छन् । महतोको उचाइँ बढेको देखेपछि यादव र ठाकुरले चिन्ता जनाउने गरेको स्रोतको भनाइ छ ।

आन्दोलनकै क्रममा विराटनगरको झडपमा घाइते भएका महतो अहिले धरानमा उपचार गराइरहेका छन् । मधेस आन्दोलनमा मधेसी मोर्चाका चार राजनीतिक दलमध्ये धेरै फाइदा सद्भावना पार्टीलाई पुगेको राजनीतिक विश्लेषकहरूको भनाइ छ ।

यतिसम्मकी उपेन्द्र यादव र राजेन्द्र महतोबीच सार्वजनिक कार्यक्रममै भनाभन हुन थालेका समाचार आउन लागेका छन् । यादव र महतोको निजी सहयोगीहरूमार्फत एकअर्काप्रति लाञ्छना लगाउन पनि थालिएको छ ।

सामाजिक सञ्जालहरू प्रयोग गरेर यादव र महतोले एकअर्कालाई लाञ्छना लगाउने गरेका हुन् ।

आरोप प्रत्यारोपका कारण अहिले विशेष गरेर तीन शीर्ष नेता यादव, ठाकुर र महतोबीच राम्रोसँग बोलचालै हुन छाडेको स्रोतको भनाइ छ ।

मिडियाको डरले तीन शीर्ष नेताहरू एकै स्थानमा रहेको संकेत दिन खोजेपनि उनीहरूबीच सम्बन्ध तनाबपूर्ण छ ।

एकथरी युवा नेताहरू चार शीर्ष नेताहरूलाई मिलाएर मधेस आन्दोलनलाई आफ्नो लक्ष्यामा पुगाउन सक्रिय पनि छन् । तर ती युवा नेताहरूलाई संघीय समाजवादी फोरमका अध्यक्ष उपेन्द्र यादवले मन पराउने गरेका छैनन् ।

पुस १९ गते मधेसी मोर्चाको बैठक बस्ने भनेर तमलोपा अध्यक्ष ठाकुर र संघीय फोरमका अध्यक्ष यादवले सार्वजनिक अभिव्यक्ति दिइसकेका छन् ।

बैठक बस्ने हो की नबस्ने हो त्यसबारेमा सद्भावना पार्टीलाई कुनै जानकारी छैन । सद्भावना स्रोतका अनुसार पुस १९ गते मधेसी मोर्चाको बैठक बस्ने सम्भावना अत्यन्तै न्यून छ ।

पुस १९ गते बुटवल र अन्य विभिन्न स्थानहरूमा आन्दोलनका कार्यक्रम रहेकाले सो दिन बैठक बस्नेमा शंका रहेको स्रोतले जनाएको छ ।