सुशीललाई ‘नङ्गयाउन’ देउवाको यस्तो चाल !

काठमाडाैं । राज्यका कुनै पनि पद हात नपरेपछि कांग्रेसमा नेता शेरबहादुर देउवा पक्षधर नेताहरुले सभापति सुशील कोइरालालाई संसदीय दलको नेताबाट हटाउने गृहकार्य थालेका छन् ।

कोइराला आफ्नै कारणले प्रधानमन्त्रीमा पराजित भएका कारण उनी पूर्ण रुपमा असफल भएको निष्कर्ष निकाल्दै सधैंको असन्तुष्ट देउवा पक्षले दलको नेताबाट सुशीललाई हटाउने गृहकार्य अघि बढाएको हो ।

सुशीलको असफल र अव्यवहारिक नेतृत्वकै कारण मुलुकको परिस्थिति कांग्रेस अनुकूल नभएको देउवा पक्षको बुझाई छ । राष्ट्रपति, उपराष्ट्रपति, सभामुख, उपसभामुख लगायत सबै पद गुमाउनुपर्नाको कारण कोइराला नै रहेको देउवा पक्षको ठहर छ ।

सबैतिर असफल भएपछि देउवा पक्षीय नेताहरुले तत्काल संसदीय दलमा निर्वाचन गर्नुपर्ने पक्षमा यो पक्ष छ । नेता शेरबहादुर देउवाले प्रधानमन्त्रीको उम्मेवदार चयनकै बेला संसदीय दलको उम्मेदवार चयन गर्नका लागि चुनावको माग गरे पनि सुशील आफैं प्रधानमन्त्रीको उम्मेदवार बनेका थिए । अब १३ औं महाधिवेशन केन्द्रित हुँदै कांग्रेसमा नेताहरुले आ आफ्नो तयारी गर्ने भएका छन् । राजधानी दैनिकमा खबर छ ।