साउन मसान्तमै संविधान: मन्त्री आचार्य

विराटनगर, १६ साउन । वन तथा भूसंरक्षणमन्त्री महेश आचार्यले संविधान निर्माणको काम तीव्र गतिले भइरहेकाले यही साउन मसान्तसम्म संविधान जारी हुने बताउनुभएको छ ।

विराटनगर विमानस्थलमा आज सञ्चारकर्मीसँग कुरा गर्दै उहाँले प्रारम्भिक मस्यौदामा प्राप्त जनताका सुझावलाई छलफल गरी मस्यौदामा समेट्ने उद्देश्यले गहन रुपमा छलफल भइरहेकाले निर्धारित मितिमै संविधान जारी हुने विश्वास व्यक्त गर्नुभयो ।

“सबै दललाई सम्बोधन हुने गरी सीमाङ्कनसहित संविधान जारी गर्न प्रयास भइरहेको र सो विषयमा असन्तुष्ट दलसँग वार्ताका लागि प्रधानमन्त्रीसहित चार दलका नेता प्रयत्नशील हुनुहुन्छ’–उहाँले भन्नुभयो । रासस