पहिरोले सडक अवरुद्ध भएपछि उत्तरी गोरखामा नुन, तेलको अभाव

गोरखाबजार, १५ साउन । हालै गएको विनाशकारी भूकम्पपछि चिराचिरा भएको जमिनमा पानी छिरेपछि उत्तरी गोरखाको अधिकांश क्षेत्रमा पहिरो झरेको छ । पहिरोले गाउँले विस्थापित नभए पनि रातभर जाग्राम बस्नुपर्दा समस्यामा छन् । सिर्दिवास, काशीगाउँ, केरौँजा, उहिया, लापु, थुमी, गुम्दा, लाप्राक र बारपाक क्षेत्रमा पहिरोको उच्च जोखिम रहेको छ ।

“सदरमुकाम जानआउन तीन दिन लाग्छ” केरौजा गाविसका मीनबहादुर गुरुङले भन्नुभयो – “हिउँदमा सोतीबजारसम्म गाडी चल्थ्यो । बर्खा लागेपछि हिँड्नुको विकल्प छैन ।” भूकम्पपछि चिरा परेका डाँडा पानी परेपछि गलेको भन्दै उहाँले जुनसुकै बेला पनि पहिरो झर्न सक्ने र गाउँ पुर्न सक्ने भएकाले गाउँले सचेत रहेको बताउनुभयो ।

भूकम्पपछि झरेको पहिरो पन्छाउन नसक्दा सेना, सशस्त्र प्रहरीले केरौँजा हुँदै सिर्दिवासको जगतबजार जोड्ने गोरेटो बाटो खुलाएका थिए । तर, नयाँ खोलेको बाटोभरि पहिरो झरेकाले हिँड्न सक्ने अवस्था नरहेको इच्छा निमाविका शिक्षक विजयराज सापकोटाको भनाइ छ ।

“एक महिना काम गरेर खोलेको बाटो पनि पहिरोले भत्क्यो” शिक्षक सापकोटाले भन्नुभयो – “राज्यको सम्पत्ति र सेना, प्रहरीको पसिना बग्यो, स्थानीयवासीले बाटो हिँड्न सकेनन् ।” भूकम्पपछि लापुबेँसी, माछाखोला, उहियाको तातोपानी बजार क्षेत्र हुँदै सिर्दिवास पुग्ने मनास्लु पदमार्गमा पहिरो झरेपछि केरौँजा, हुल्चोक हुँदै जगतबजार जोड्ने बाटो सञ्चालनमा ल्याइएको थियो ।

तिब्बतसँग सिमाना जोडिएको उत्तरी गोरखाको चुम्चेत गाविसका शेराप गुरुङका अनुसार गाउँमा अहिले नुनको अभाव छ । “गाउँले अलिनो तरकारी खान बाध्य छन् । खुर्सानी, मरमसला केही छैन” गुरुङले भन्नुभयो – “राहत बाँडेको बेला तीन पोका नुन पाएका थियौँ, त्यो सकियो ।” नुन, खुर्सानी उपलब्ध भएमा सिस्नोको मुन्टा खाएर गाउँलेले छाक टार्न सक्ने गुरुङको भनाइ छ ।रासस