काठमाडौं, २६ भदौ ।बिहीबार राजधानीमा सुबिसु क्यान सफ्टेक–२०१४ को उदघाटन गर्ने क्रममा विज्ञान तथा प्रविधि मन्त्रालयका सचिव कृष्णचन्द्र पौडेलले आगामी असोज एक गते सूचना–प्रविधि पार्क सञ्चालनको प्रस्ताव मन्त्रीपरिषदमा पठाउने बताउनु भएको छ ।
उहाँले कार्यक्रममा बोल्दै काभ्रेको धुलिखेलमा आइटी पार्कका लागि पूर्वाधार तयार भइसकेको समेत जानकारी दिनुभयो ।
मन्त्रीपरिषदले स्वीकृत गरे एक वर्षभित्र पार्क सञ्चालनमा आउने उहाँको दाबी छ ।
आइटी पार्क सञ्चालनमा आए सूचना प्रविधिको क्षेत्रमा नयाँ आयाम थपिने पनि उहाँले विश्वास व्यक्त गर्नुभयो ।
कार्यक्रममा सभामुख सुवाषचन्द्र नेम्बाङले मुलुकको विकासका लागि सूचना प्रविधि अत्यावश्यक भएको भन्दै आइटीका माध्यमबाट विकासको गतिमा लम्किन छिमेकी देश भारत र चीनबाट सिक्नुपर्नेमा जोड दिनुभयो ।
नेपालमा ज्ञान र सीपमा आधारित उद्योगको ठूलो सम्भावना रहेको भन्दै उहाँले सूचना प्रविधि नै ज्ञान र प्रविधिको मूख्य आधार भएको प्रष्ट पार्नुभयो ।
बिहीबारदेखि सुरु भएको सुबिसु क्यान सफ्टेक मेला शनिबारसम्म चल्ने छ ।
मेलामा सूचना प्रविधिसँग आधारित १ सय ४२ वटा स्टलहरु छन् ।
मेलामा कम्युटर शिक्षा, कम्प्युटर सुरक्षा, बैंकिङ, सूचना व्यवस्थापन, लेखा व्यवस्थापन, एन्टीभाइरस, अस्पताल व्यवस्थापन लगायतका सफट्वेरहरु प्रदर्शनीमा राखिएको छ ।
प्रतिक्रिया