युक्रेनी नेतालाई स्वीकार गर्न रसियासँग अमेरिकी आग्रह

– सिन्ह्वा

वासिङ्टन, २४ जेठ । अमेरिकी राष्ट्रपति बाराक ओबामाले रसियाले युक्रेनमा महिनौँसम्मको सङ्कट समाधान गर्न चाहे त्यहाँका नवनिर्वाचित नेतालाई वैधानिक नेताका रूपमा स्वीकार गर्नुपर्ने बताएका छन् ।

फ्रान्सको नोर्मान्डीमा डी–डेको वार्षिकोत्सवको रूपमा आयोजित कुटनीतिक भेलामा व्यस्तताअघि अमेरिकी एक टेलिभिजनलाई राष्ट्रपति ओबामाले उक्त कुरा बताएका हुन् । यसै भेलामा रसियाली राष्ट्रपति पुटिनले युक्रेनका नवनिर्वाचित राष्ट्रपति पेत्रो पोरोसेन्कोसँग केही समय वार्ता गरेका थिए ।

अमेरिकी राष्ट्रपति ओबामाले पनि रसियाली समकक्षी पुटिनलाई अनौपचारिक रूपमा भेट गरे । उनले अफगानिस्तान युद्ध तथा इरानसँग अन्तिरिम पारमाणविक सम्झौताका विषयमा रसियाको सहयोगको महत्व हुने बताए ।

अमेरिकी राष्ट्रपति ओबामाले एनबीसी नाइटली न्युज नामक कार्यक्रममा युक्रेनको अवस्थाको विषयमा समास्या समाधान हुनुपर्नेमा जोड दिए ।