काठमाडौं, १० कात्तिक । राष्ट्रपति निर्वाचनका लागि आज संसद सचिवालयमा उम्मेदवारी दर्ता गरिने भएको छ । संसद सचिवालयले तोकिएको समयभित्र उम्मेदवारी दिन समय तोकिएको हो ।
आज उम्मेदवारी दर्ता भएपछि भोलि बुधबार राष्ट्रपति उम्मेदवारको निर्वाचन हुनेछ । राष्ट्रपतिमा एमाले र कांग्रेसले दाबी गरेका छन् ।
सहमतिका आधारमा राष्ट्रपति र उपराष्ट्रपतिको निर्वाचन गरिने कार्यतालिका आइतबार नै अन्त्य भएपछि राष्ट्राध्यक्षको छनोट प्रक्रियामा बहुमतीय प्रक्रियामा प्रवेश गरेको हो ।
सचिवालयले बहुमतीय आधारमा ती पदका लागि सार्वजनिक गरेको निर्वाचन कार्यक्रमअनुसार आज बिहान १० बजेदेखि १ बजेसम्म उम्मेदवारीको प्रस्ताव दर्ता गराउन समय तोकिएको छ ।
सो अवधिभित्र दर्ता गराइएका प्रस्तावबमोजिमको राष्ट्रपति र उपराष्ट्रपति पदको उम्मेदवारको वर्णानुक्रमानुसारको नामावली प्रकाशन हुनेछ ।
प्रकाशित नामावलीमाथि आजै अपराह्न २ बजेसम्म दाबी विरोध गर्ने समय तोकिएको छ । उम्मेदवारी दर्ता गराएको भए पनि फिर्ता लिन चाहने उम्मेदवारलाई सचिवालयले समय समेत उपलब्ध गराएको सहायक प्रवक्ता सुदर्शन कुइँकेलले जानकारी दिनुभयो ।
निर्वाचन कार्यक्रमानुसार कात्तिक ११ गते अपराह्न ३ बजे व्यवस्थापिका–संसदमा राष्ट्रपति र उपराष्ट्रपति चयनका लागि गोप्य मतदान हुनेछ ।
राष्ट्रपतिका लागि प्रमुख सत्तारुढ दल नेकपा(एमाले)ले उपाध्यक्ष विद्यादेवी भण्डारीलाई उम्मेदवार बनाउने निर्णय गरेको छ ।
प्रमुख प्रतिपक्षी दल नेपाली कांग्रेसले हालसम्म ती पदका लागि उम्मेदवारी दिने घोषणा गरे पनि कसलाई उम्मेदवार बनाउने भन्नेबारेमा आधिकारिक निर्णय भने आइसकेको छैन ।
एकीकृत माओवादीले उपराष्ट्रपतिमा पूर्वलडाकु प्रमुख नन्दबहादुर पुनलाई उम्मेदवार बनाउने निर्णय गरेको छ । अन्य दलका तर्फबाट भने उपराष्ट्रपतिको उम्मेदवारको नाम सार्वजनिक गरिएको छैन ।
प्रतिक्रिया