एमालेको चियापानमा देखियो ओली-प्रचण्डको ‘पिरती’ ! (हेर्नुस चियापानका सम्पूर्ण झलकहरु)

काठमाडौँ, ५ असोज । नेकपा एमालेले नयाँ संविधानको स्वागतमा राजधानीमा गरेको चियापान कार्यक्रममा नेकपा एमालेका अध्यक्ष केपी शर्मा ओली र एमाओवादीका अध्यक्ष पुष्पकमल दाहाल प्रचण्डबीच गहिरो ‘पिरती’ देखियो ।

कुनै बेला एकले अर्काको नामै नसुन्न चाहने र आरोप-प्रत्यारोपमा मात्रै जुटिरहने यी दुई शीर्ष नेतालाई परिस्थितिले एकै ठाउँमा ल्याइदिएको छ । एमालेले काठमाडौँको दशरथ रंगशालामा गरेको चियापानमा भाग लिन अन्य नेताहरुसँगै पुगेका प्रचण्ड कहिले बसेर ओलीसँग गफिँदै थिए त कहिले कानेखुसी गर्दै थिए । दुई नेताबीचको गहिरो भलाकुसारी देख्दा एमालेका अन्य नेता र कार्यकर्ताहरु पनि रमाइलो मानिरहेका थिए । एमाओवादीका वरिष्ठ नेता डा. बाबुराम भट्टराई ओलीसँग टाढिँदै गर्दा प्रचण्ड भने नजिकिएका छन् । ओली र प्रचण्डको मिलापकै कारण नयाँ संविधान समेत सम्भव भएको कतिपयको बुझाइ छ ।

दशरथ रंगशालामा पुगेका प्रधानमन्त्री सुशील कोइरालालाई पनि एमालेले भव्य स्वागत गरेको थियो । कार्यक्रम संचालकले प्रधानमन्त्रीको आगमन भएको भन्दै सबै नेता तथा कार्यकर्तालाई तालीले स्वागत गर्न आह्वान गर्दा प्रधानमन्त्री कोइरालाको मुहार फर्किएको फुलझैँ भएको थियो ।

एमालेको चियापानले दशरथ रंगशाला भरिएको थियो । हेर्नुस् फोटोफिचर: