विश्वको पहिलो समलिङ्गी प्रधानमन्त्रीले दिए पदबाट राजीनामा

डब्लिन, ८ चैत । आयरल्याण्डका प्रधानमन्त्री लियो वराडकरले अचानक राजीनामाको घोषणा गरेर सबैलाई चकित बनाउनुभएको छ ।

बुधबार राजीनामाको घोषणा गर्दै वराडकरले आफ्नो निर्णयको पछाडि व्यक्तिगत र राजनीतिक कारण रहेको बतानुभयो । उहाँले प्रधानमन्त्री पदसँगै फाइन गेल पार्टीको नेताको भूमिका पनि त्याग्ने बताउनुभएको छ । वराडकर २०१७ मा आयरल्याण्डको प्रधानमन्त्री बन्नुभयो, जो विश्वको पहिलो समलिङ्गी प्रधानमन्त्री पनि हुनुहुन्छ ।

तीन दलको गठबन्धनको सहयोगमा प्रधानमन्त्री बनेका वराडकरले पनि राजीनामा दिएपछि आम चुनाव नहुने बताउनुभयो । उहाँको स्थान फाइन गेल पार्टीका अर्का नेताले लिनुहुनेछ, जसमा चाँडै निर्णय लिइने छ । अप्रिलमा आयरिश संविधानमा प्रस्तावित परिवर्तनका लागि दुईवटा जनमत संग्रहमा सरकारको हार पछि वराडकरको राजीनामा आएको मानिन्छ ।

राजीनामाको घोषणा गर्दा वराडकरले राजनीतिमा बिताएको समय सन्तोषजनक रहेको र आफनो स्थानमा आउने नेतृत्वले देशलाई अगाडि बढाउन राम्रो स्थितिमा पुग्ने विश्वास व्यक्त गर्नुभयो । उहाँले भन्नुभयो, ‘सात वर्ष पदमा बसेपछि आफू त्यो पदका लागि पूर्णरुपमा उपयुक्त छु जस्तो लाग्दैन ।’

युरोपेली संसद र स्थानीय चुनाव हुनुभन्दा १० साता अघि वराडकरको राजीनामालाई स्तब्ध पार्ने कदमका रूपमा व्याख्या गरिएको छ । एक वर्षभित्र आम निर्वाचन हुन लागेको भन्दै केही राजनीतिक विज्ञले यो राजीनामालाई राजनीतिक भूकम्पको संज्ञा दिइरहेका छन् ।

वराडकरले भन्नुभयो कि राजनीतिज्ञहरू पनि मानव हुन् र तिनीहरूका सीमितताहरू छन् । वराडकरले जोड दिनुभयो कि उहाँ विश्वास गर्नुहुन्छ कि सरकार पुनः निर्वाचित हुन सक्छ ।

फाइन गेल पार्टीले भर्खरै पाँचवटा उपचुनाव हारेको छ, जसले केही पार्टीका नेताहरूले वराडकरलाई प्रश्न गर्न अग्रसर रहेको बेला यो राजीनामा आएको हो ।