काठमाडौं, ७ माघ । साल्ट्र ट्रेडिङ कर्पोरेशन लिमिटेडका अध्यक्ष एवम् पूर्वसांसद लक्ष्मीदास मानन्धरको ९३ वर्षको उमेरमा निधन भएको छ ।
कोरोना परीक्षण गर्न बिहीबार काठमाडौंको ह्याम्स अस्पतालमा पुगेका मानन्धरको अस्पतालमै निधन भएको पारिवारिक स्रोतले जानकारी दिएको छ ।
वरिष्ठ उद्योग व्यवसायी समेत रहेका मानन्धर पूर्व सांसद र पूर्व सांसद मञ्चको आजीवन सदस्य समेत थिए । मानन्धर २०५८ मा एमालेबाट राष्ट्रियसभामा चुनिएका थिए ।
त्यस्तै नेकपा एमाले र नेकपा माओवादीको एकतापछि बनेको तत्कालीन नेकपाको उद्योग व्यवसायी महासंघका संयोजक रहेका मानन्धर समाजसेवा शान्ति शिक्षा मन्दिर माध्यमिक विद्यालयका सञ्चालक समिति अध्यक्ष रहँदै आएका थिए ।
नेपाल उद्योग वाणिज्य महासंघका कोषाध्यक्ष समेत भइसकेका मानन्धर नेपालका प्रतिष्ठित उद्योगपति एवम् व्यवसायीकारूपमा चिनिदै आएका थिए ।
स्वर्गीय मानन्धरका श्रीमती, दुई छोरा र दुई छोरी छन् ।
प्रतिक्रिया