माओवादीले समर्थन फिर्ता नलिएसम्म नयाँ सरकार गठनको सम्भावना छैन : देउवा

काठमाडौं, ६ वैशाख । नेपाली कांग्रेसका सभापति एवं पूर्वप्रधानमन्त्री शेरबहादुर देउवाले सरकारलाई दिएको समर्थन माओवादीले फिर्ता नलिएसम्म नयाँ सरकार गठनको कुनै सम्भावना नभएको बताएका छन् ।

आइतबार आफ्नै निवासमा नुवाकोटका साहित्यकार श्रीराम श्रेष्ठद्वारा लिखित खोजमुलक सांस्कृतिक ग्रन्थ ‘नेपाली जनजातीय संस्कार र संस्कृति’ लोकार्पण गर्दै सो कुरा बताएका हुन् । उनले अहिलेको राजनीति एकदमै तरल अवस्थामा रहेकाले भोलि जे पनि हुनसक्ने समेत बताएका छन् ।

नयाँ सरकार गठनका लागि माओवादी केन्द्रले तत्काल सरकारलाई दिएको समर्थन फिर्ता लिनुपर्ने बताउँदै देउवाले भने, ‘सर्वोच्च अदालतको फैसलाले एमाले र माओवादी केन्द्र अलग भएका छन् । ओली र प्रचण्डबीच द्वन्द्व देखिएको छ । तर, अहिलेसम्म माओवादीले किन समर्थन फिर्ता लिएको छैन ? यसमा शंका छ । ओली अहिले पनि सुविधाजनक बहुमतमै छन् । अल्पमतमा छैनन् । माओवादीले अविश्वासको प्रस्ताव फिर्ता लिएमा कांग्रेस सरकार गठन गर्न अग्रसरता लिन्छ ।’