काठमाडौं, २७ साउन । गोंगबुमा आइतबार बिहान सुटकेशमा शव फेला परेका दाङका कृष्णबहादुर बोहोराको अण्डकोषमा हानेर हत्या गरेको खुलेको छ ।
महानगरीय प्रहरी परिसर काठमाडौं र महानगरीय अपराध महाशाखाले मंगलबार संयुक्त पत्रकार सम्मेलन गरेर बोहोराको हत्यामा संलग्न भएको आरोपमा पक्राउ परेकी कल्पना मुडभरी पौडेललाई सार्वजनिक गरेको छ ।
पत्रकार सम्मेलनमा काठमाडौं प्रहरी परिसर प्रमुख एसएसपी श्यामलाल ज्ञवालीले कल्पना र कृष्णबहादुरबीच तीन–चार वर्षअघि फेसबुकबाट चिनजान भएको जानकारी दिए ।
आपसमा चिनजान भएपछि कृष्णबहादुरले नक्कली फेसबुक एकाउन्ट बनाएर महिलाका निर्वस्त्र तस्वीरहरू राख्न थालेका थिए । केही दिनअघि उनले कृष्णबहादुरलाई रक्सीमा हालेर स्लिपिङ ट्याबलेट खुवाएको र सुतेपछि अण्डकोषमा हम्मरले हानेर मारेको कल्पनाले स्वीकार गरेको प्रहरीले बताएको छ ।
महाशाखाका एसएसपी दीपक थापाका अनुसार हत्यापछि शव व्यवस्थापन गर्न कल्पनाले टाउको र खुट्टा आफैंले काटेको बताएकी छिन् ।
‘शव फालेर उनी एम्बुलेन्समार्फत चितवन गएको प्रारम्भिक बयान दिएकी छिन् । प्रहरीले उनलाई सोमबार साँझ चितवनबाट पक्राउ गरेर काठमाडौं ल्याएको हो ।
कल्पनाले केही टेलिश्रृंखलाहरुमा अभिनयसमेत गरेको प्रहरीले जनाएको छ । उनीसँगै पक्राउ परेकी १५ वर्षीया किशोरी भने १० कक्षामा अध्ययनरत रहेको प्रहरीले बताएको छ ।
‘हत्याको मुख्य कारण यौन शोषण र नांगो तस्बिर फेसबुकमा हालेको भन्ने नै देखिएको प्रहरीको अनुमान छ ।
प्रतिक्रिया