दाङ, २२ फागुन । होलीको रमाइलो गरिरहँदा नाक नै गुमाउनुपर्ला भन्ने के थाहा तर दाङको देउखुरीमा आज यस्तै अनौठो घटना भएको छ ।
रङ अबिरसँगै पिकनिकको रमाइलो गरिरहेको अवस्थामा आपसमा भनाभन हुँदा देउखुरीका एक युवकले नाक टोकेपछि अर्का एक युवकको नाक छिनिएको छ ।
होलीको रमाइलोसँगै पिकनिक खानका लागि सतबरिया–१ बनघुस्री पुगेका लमही नगरपालिका–८ बस्ने ४० वर्षीय शिवकुमार कुमाल र सोही स्थान बस्ने ४७ वर्षीय देवराज कुमालको आपसमा भनाभन हुँदा शिवकुमार कुमालले देवराज कुमालको नाक टोकेर छिनालेको वडा प्रहरी कार्यालय लमहीले जनाएको छ ।
घाइते देवराज कुमाललाई प्राथमिक स्वास्थ्य केन्द्र लमहीमा प्रारम्भिक उपचार गरी थप उपचारका लागि आजै जिल्लाबाहिर पठाइएको प्रहरीले जनाएको छ । नाक टोक्ने शिवकुमार कुमाललाई वडा प्रहरी कार्यालय लमहीले आफ्नो नियन्त्रणमा लिएको प्रहरीप्रमुख लक्ष्मणबहादुर शाहीले जानकारी दिनुभयो ।
प्रतिक्रिया