काठमाडौं । आईसीसी विश्वकप क्रिकेट लिग–२ शृङ्खलाको अन्तिम खेलमा नेपाल विजयी भएको छ ।
सोमबार ओमानमाथि १० रनकाे राेमाञ्चक जित निकालेपछि नेपालले अंक तालिकाकाे छैटौं स्थानमा सुरक्षित गर्दै लिग-२ टुंगाएकाे हाे ।
याे जितले नेपाल ३६ खेलमा ३० अङ्कसहित छैटौं स्थानमा पुगेको छ । लिग–२ को शीर्ष–६ मा पर्ने टोलीले एकदिवसीय मान्यता कायमै राख्ने सम्भावना धेरै छ ।
यसअघि शीर्ष–४ को होडबाट बाहिरिइसकेको नेपाल सन् २०२७ को एकदिवसीय विश्वकपको छनोटमा सीधै पुग्न असफल भएको थियो । अब नेपालले विश्वकप छनोटमा स्थान बनाउन प्लेअफ खेल्नुपर्नेछ ।
जितका लागि पाएकाे २८१ रनकाे लक्ष्य पछ्याएकाे ओमानले ५० ओभरमा ७ विकेटको क्षतिमा २७० रन मात्रै बनाउन सक्याे । उसका जतिन्दर सिंह र हम्माद मिर्जाले अर्धशतकीय पारी खेले पनि जित दिलाउन सकेनन् । सिंहले सर्वाधिक ८९ तथा मिर्जाले ८७ रन बनाए ।
नेपालका दीपेन्द्र सिंह ऐरी र ललित राजवंशीले २/२ विकेट लिँदा नन्दन यादव र कप्तान सन्दीप लामिछानेले १/१ विकेट हात पारे ।
यसअघि नेपालले घरेलु टोली ओमानलाई २८१ रनको लक्ष्य दिएको थियाे ।
अल अमिरात क्रिकेट मैदानमा टस जितेर ब्याटिङ गरेको नेपालले ५० ओभरमा सबै विकेट गुमाएर २८० रन बनायो । नेपालका ३ जना खेलाडीले अर्धशतक बनाए । रोहित पौडेल ८०, दीपेन्द्रसिंह ऐरी ६९ र देव खनाल ५७ रन बनाएको आउट भए ।
सोमबारकाे खेलमा दीपेन्द्र र रोहितले चौथो विकेटका लागि १३९ रनको कीर्तिमानी साझेदारी गरे । यसअघि भीम सार्की र गुल्सन झाले चाैथाे विकेटका लागि गरेकाे ९६ रनको साझेदारी सोमबार ताेडिएको हो ।
ओमानका शाह फैसलले ५, जे ओदेद्राले ३ विकेट लिएका थिए ।
प्रतिक्रिया