अपडेट : श्रीलंकाका चर्च र पाँचतारे होटलमा बिस्फोटमा कम्तीमा १०० जनाको मृत्यु

काठमाडौं, ८ वैशाख । श्रीलंकामा आइतबार बिहान भएको बम विष्फोटमा कम्तीमा १ सय जनाको मृत्यु भएको छ ।

घटनामा २०० जनाभन्दा बढि घाइते भएको बिबिसीले जनाएको छ । कोच्चिकाडे, बट्टिकलोआ र कटुवापिटिया जिल्लामा रहेका गिर्जाघरमा आइतवार बिहान विस्फोटनहरू भएका थिए।

विस्फोटन हुँदा इसाई धर्मावलम्बीहरू इस्टर पर्वका अवसरमा आयोजित धार्मिक कार्यक्रममा सहभागी हुँदैथिए।

मध्य कोलम्बोस्थित साङ्ग्रिला, सिनमन ग्र्यान्ड र किङ्सबरी होटलमा पनि छुट्टाछुट्टै विस्फोटन भएको बताइएको छ। आक्रमणहरूको कसैले जिम्मा लिइसकेको छैन।

श्रीलङ्काका अर्थमन्त्री मङ्गल समरवीरले निर्दोष मानिसहरूको ज्यान लिँदै अराजकता सिर्जना गराउने प्रयासस्वरूप ती विस्फोटन गराइएको भन्दै प्रजातन्त्र, स्वतन्त्रता र आर्थिक समृद्धि चाहने सबैलाई एकजुट हुन आग्रह गरेका छन्।