नयाँ दिल्ली, २१ चैत । भारतीय कांग्रेसका अध्यक्ष राहुल गान्धीले केरल राज्यको वायनाडबाट पनि लोकसभा निर्वाचनका लागि उम्मेदवारी दर्ता गरेका छन् ।
उनले उत्तर प्रदेशको अमेठीबाट पनि उम्मेदवारी दिएका छन् । राहुलले दुई निर्वाचन क्षेत्रबाट लोकसभा निर्वाचनमा उम्मेदवारी दिएका हुन् । बिहीबार वायनाड पुगेका गान्धीले दुई किलोमिटर लामो चुनावी रोड शो पनि गरेका छन् ।
उनको साथमा बहिनी तथा कांग्रेसकी महासचिव प्रियंका गान्धी पनि छन् । राहुलले पहिलोपटक अमेठीभन्दा बाहिर उम्मेदवारी दिएका हुन् । कांग्रेसले हालसम्म ३४९ उम्मेदवारको नाम तय गरेको छ ।
राहुलले उम्मेदवारी दिएको वायनाड निर्वाचन क्षेत्र रणनीतिक रूपमा महत्वपूर्ण मानिएको छ । उक्त निर्वाचन क्षेत्रले केरल, कर्नाटक र तमिलनाडु राज्यको सीमानालाई जोड्छ । राहुल उक्त निर्वाचन क्षेत्रमा उम्मेदवार बनेपछि अन्य राज्यमा पनि कांग्रेसको पक्षमा माहोल बन्ने विश्लेषण गरिएको छ ।
यो निर्वाचन क्षेत्र सांस्कृतिक रूपमा पनि महत्वको मानिएको छ। यो निर्वाचन क्षेत्रले भौगोलिक र सांस्कृतिक रूपमा पूरै दक्षिण भारतको प्रतिनिधित्व गर्ने बताइएको छ ।
यता सत्ताधारी दल भारतीय जनता पार्टीले भने राहुल गान्धी अमठीमा पराजित हुने भयले वायनाड गएको आरोप लगाएको छ। भाजपा अध्यक्ष अमित शाहले राहुल गान्धी अमेठी छोडेर भागेको भन्दै व्यंग गरेका छन् ।
उनले राहुल अमेठी गएर ध्रुवीकरणको राजनीति गरेर जित हात पार्ने खोजेको आरोप पनि लगाएका छन् । राहुल अमेठीबाट सन् २००४ यताका तीन लोकसभा निर्वाचनमा विजयी भएका सांसद हुन् ।
यो निर्वाचनमा अमेठीमा भाजपाले केन्द्रीय मन्त्री तथा विगतमा राहुलसँग पराजित भएकी स्मृति ईरानीलाई उम्मेदवार बनाएको छ।
प्रतिक्रिया