आत्मरक्षाका लागि किशोरीलाई तालिम

बालकुमारी क्याम्पसमा अध्ययनरत सिर्जना पौडेल पछिल्लो समय समाजमा हुने गरेका महिला हिंसाका घटनालाई न्यूनीकरण गर्नका लागि पनि यस्ता तालिम आवश्यक रहेको बताउनुहुन्छ । अहिले लिएको तालिमले आत्मविश्वास बढ्ने र शरीरको सुरक्षाका विषयमा ज्ञान दिएको पौडेलले बताउनुभयो ।

भरतपुर महानगरपालिका–४ लङ्कु माध्यमिक विद्यालयमा कक्षा ९ मा अध्ययनरत ममता गौतम यो तालिमले कसैले आक्रमण गर्यो भने कसरी बाँच्ने भन्ने ज्ञान दिएको बताउनुभयो ।

तालिम नलिँदा कसरी बाँच्न सकिन्छ भन्ने सोच आफूमा भए पनि अहिले सहजरुपमा त्यस्ता अपराधीबाट बाँच्न सक्ने हिम्मत बढेको उहाँ बताउनुहुन्छ ।

विद्यार्थी परिषद्ले सञ्चालन गरेको यस अभियानमा चितवनका सबै स्कूल र क्याम्पसमा अध्ययनरत छात्रालाई आत्मरक्षाको तालिम सञ्चालन गर्दै आएको छ ।

शुक्रबार भरतपुरको गेष्टहाउस चौरमा दिइएको तालिमको समापन गर्दै चितवनका प्रमुख जिल्ला अधिकारी जीतेन्द्र बस्नेतले महिलालाई दिइने यो तालिम उत्तम रहेको बताउनुभयो ।

यस्ता तालिमले समाजमा हुने विकृति र विसङ्गतिको अन्त्य गर्दै आत्मसम्मान र आत्मरक्षाका लागि सहयोग पुग्ने उहाँको भनाइ थियो । –रासस