हतियारधारीको भिषण आक्रमणपछि भारतको आसाममा हजारौँ गाउँ छाडे

गुवाहाटी, १० पुस । उत्तरपूर्वी भारतीय राज्य आसामको एक दुर्गम इलाकामा  मङ्गलबार राति सशस्त्र हतियारधारीहरुले भिषण आक्रमण गरेपछि दुई हजारभन्दा बढी गाउँहरु घर छोडी भागेका छन् ।

गत मङ्गलबार अबेर राति भएको सो आक्रमणमा परी कम्तीमा पनि ६९ गाउँलेको हत्या भएको थियो । आतङ्ककारी प्रकृतिका ती हतियारधारीले मङ्गलबार राति गाउँलेलाई घरबाट निकालेर सडकमा ल्याई हत्या गरेका थिए ।

आक्रमणबाट ज्यान गुमाउने व्यक्तिको सङ्ख्या ६९ पुगेको प्रहरीले बिहीबार बिहान जानकारी दिएको छ । यस आक्रमणबाट ज्यान गुमाउने ज्यक्तिहरुमा १८ बालबालिका रहेका पनि सो स्रोतले जनाएको छ ।

सो आक्रमणमा अन्य ८० जना घाइते भएका छन् । घाइतेमध्ये २० जनाको अवस्था गम्भीर रहेको पनि प्रहरीले बताएको छ ।

आसामको सधैँ अशान्त भइरहने इलाकामा मङ्गलबार अबेर राति भएको सशस्त्र हतियारधारीहरुले आफ्नो घरमा सुतिरहेका गाउँलेलाई तानेर ल्याएर गोली हानी हत्या गरेका प्रत्यक्षदर्शीहरुले जनाएका छन् ।

प्रहरीका अनुसार यस आक्रमणमा नेसनल डेमोक्र्याटिक फ्रन्ट अफ बोडोल्यान्ड (एनडिएफबी)को हात रहेको दाबी गरिएको छ ।

एनडिएफबीले दशकौँदेखि आसामलाई अलग र स्वायत्त राज्यको माग गर्दै आन्दोलन जारी राखेको छ । उनीहरुको सो सशस्त्र विद्रोहका कारण उक्त राज्यमा हजारौँ नागरिकको ज्यान गएको छ । रासस/एएफपी