बाजुरा पूर्ण खोपयुक्त घोषणा

बाजुरा, १४ पुस । बाजुरा जिल्लालाई पूर्ण खोपयुक्त घोषणा गरिएको छ । देशकै ३२ औं जिल्लाका रुपमा बाजुरालाई पूर्ण खोपयुक्त जिल्ला घोषणा गरिएको हो ।

जिल्लामा बसोबास गर्ने २३ महिनासम्म सबै बालबालिकाले सम्पूर्ण खोपको मात्रा पाएपछि पूर्ण खोपयुक्त घोषणा गरिएको जनस्वास्थ्य अधिकृत रमेश कुँवरले बताए । प्रतिनिधि सभा सांसद एवम् एमाले केन्द्रीय सदस्य लालबहादुर थापाले प्रतिबद्धता पत्र र जिल्ला समन्वय समिति संयोजक एवम् खोप समन्वय समिति संयोजक नरेन्द्र कुमार रोकायाले घोषणा पत्र वाचन गरेर सयुक्त रुपमा घोषणा गरेका हुन् ।

सबै बालबालिकाले पाउनु पर्ने सबैप्रकारका खोपको मात्रा पाएको सन्देशसहित औपचारिक कार्यक्रमकाबीच पूर्ण खोपयुक्त घोषणा गरिएको जिल्ला स्वास्थ्य प्रमुख डाक्टर रुपचन्द्र विश्वकर्माले जानकारी दिए । सन् २०१७ भित्र देशलाई नै खोपयुक्त घोषणा गर्ने सरकारी लक्ष्य अनुरुप नै जिल्लालाई घोषणा गर्न जिल्ला स्वास्थ्य सफल भएको छ । घोषणा प्रमाण पत्र स्वास्थ्य मन्त्रालय अन्र्तगत चिकित्सा महाशाखा प्रमुख डाक्टर भोलामान श्रेष्ठ, स्वास्थ्य सेवा विभागका महानिर्देशक डाक्टर राजेन्द्र पन्तले जिल्ला समन्वय समिति संयोजक नरेन्द्र कुमार रोकायालाई हस्तान्त्रण गरेका थिए ।

बाल मृत्युदर शुन्यमा ल्याउन र सक्षम सवल नागरिक निर्माण गर्न खोपयुक्त घोषणा कार्यक्रमले ठूलो सफलता मिल्ने स्वास्थ्य मन्त्रालय अन्तर्गत चिकित्सा महाशाखा प्रमुख डाक्टर भोलामान श्रेष्ठले बताए । खोपको मात्रा नपाएर अकालमा ज्यान गुमाउनु पर्ने, अपाङ्गता हुनु पर्ने, अनेक प्रकारका संक्रमणको सामना गर्नु पर्ने समस्याको अन्त्य गर्न नेपाल सरकारले सञ्चालन गरेको अभियानलाई सफलता पूर्वक सम्पन्न गर्न जिल्ला स्वास्थ्यले खेलेको भूमिकाको स्वास्थ्य सेवा विभागका महानिर्देशक डाक्टर राजेन्द्र पन्तले प्रशंसा गरे ।

खोपयुक्त अभियान जिल्लाको टाँटे स्वास्थ्य चौकीबाट सुरु गरिएको थियो । बाजुरा स्वास्थ्यको सूचाङ्कमा देशकै छैटौ स्थानमा रहेको छ । स्वास्थ्य अवस्थामा भईरहेको सुधारले जिल्लालाई सबल र सक्षम बनाउन मद्दत पुग्ने र जिल्लाको परिचय नै बदलिनेमा विश्वास लिएको प्रतिनिधि सभा सदस्य लालबहादुर थापाले बताए । कार्यक्रममा स्थानीय कला संस्कृति, देउडा, भुवा चाली, सडक नाटकदेखि झाँकी समेत प्रस्तुत गरिएको थियो । जिल्लाले घोषणा कार्यक्रमलाई उत्सवका रुपमा मनाएको छ । घोषणाको अवसरमा बाजागाजा सहीतको ¥याली, साँस्कृतिक झाँकीहरु पनि प्रर्दशन गरिएको थियो ।

घोषणा कार्यक्रममा बोल्ने वक्ताहरुले घोषणालाई मात्र उपलब्धी मान्न नसकिने बताएका छन् । दिगो व्यवस्थापन र निरन्तरता आवश्यक हुने भएकोले त्यस तर्फ सबैको सहकार्य र ध्यान जान जरुरी रहेको उनीहरुको सुझाव छ । घोषणा कार्यक्रममा स्वास्थ्य संस्था, महिला स्वास्थ्य स्वयम सेविका, सञ्चार कर्मी र साझेदार निकायलाई सम्मान गरिएको छ ।

स्वास्थ्य संस्था हस्तान्त्रण

स्थानीय तहलाई अधिकार सम्पन्न बनाएसँगै स्वास्थ्य संस्थालाई पनि हस्तान्त्रण गरिएको छ । जिल्ला स्वास्थ्य कार्यालयको मातहतमा रहेका स्वास्थ्य चौकी, प्राथमिक स्वास्थ्य केन्द्रलाई सम्बन्धीत गाउँ तथा नगरपालिकामा हस्तान्त्रण गरिएको छ ।

नौ वटै स्थानीय तहमा रहेका २८ वटा स्वास्थ्य संस्थालाई स्वास्थ्य विभाग र चिकित्सा स्वास्थ्य सेवा महाशाखाका तर्फबाट प्रमाण पत्रसहित हस्तान्त्रण गरिएको छ । गाउँ तथा नगरपालिकाको स्वामित्वमा रहने गरी संस्था हस्तान्त्रण गरिएको हो ।