काठमाडौँ, ९ मंसिर । नेपाल भलिबल सङ्घको आयोजनामा प्रथम दक्षिण एसियाली आमन्त्रण महिला भलिबल प्रतियोगिता हुने भएको छ ।
सङ्घले आयोजना गरेको पत्रकार सम्मेलनमा आगामी पुस ४ देखि ८ गतेसम्म सञ्चालन हुने उक्त प्रतियोगिताका खेल त्रिपुरेश्वरस्थित राष्ट्रिय खेलकुद परिषद्को कभर्डहलमा हुने सङ्घका अध्यक्ष एवम् प्रतियोगिताका संयोजक दानबहादुर तामाङले जानकारी दिनुभयो ।
उहाँले दक्षिण एसियाली राष्ट्र र भलिबल खेलाडीबीचको सम्बन्धलाई मजबुद बनाउनका लागि उक्त प्रतियोगिताको आयोजना गर्न लागेको बताउनुभयो ।
प्रतियोगितामा नेपालसहित भारत, श्रीलङ्का, माल्दिभ्स र बङ्गलादेशको सहभागिता रहनेछ । भलिबल सङ्घबाट आर्थिक सहयोग मिलेमा अफगानिस्तानले पनि प्रतियोगितामा सहभागिता जनाउने आयोजकले जनाएको छ ।
त्यस्तै, पाकिस्तान र भुटानका महिला टोली भने तयारी अवस्थामा नरहेकाले सहभागिता जनाउने छैनन् ।
प्रतियोगितामा प्रथम, दोस्रो र तेस्रो हुने टोलीले क्रमशः दुई हजार, एक हजार र ५०० डलर प्राप्त गर्नेछन् । त्यस्तै प्रतियोगितामा उत्कृष्ट घोषित हुने एक खेलाडीले रु २५ हजार पाउने छन् ।
रु ३७ लाख ६२ हजार खर्च लाग्ने उक्त प्रतियोगिताका लागि राष्ट्रिय खेलकुद परिषद्ले रु २० लाख आर्थिक सहयोग प्रदान गरेको आयोजकले जनाएको छ ।
उक्त प्रतियोगिताका लागि सङ्घले १९ सदस्यीय नेपाली टोलीको छनोट गरी बन्द प्रशिक्षणमा यसअघि नै राखिसकेको छ ।
प्रतिक्रिया