कैलाली, ३१ भदौ । कैलालीको लम्की बजारस्थित चोकमा यात्रु सहायता कक्ष (प्याजेञ्जर हेल्प डेस्क) स्थापना भएको छ ।
दशैंतिहार तथा छठ पर्वको अवसरमा यात्रुहरुलाई हुने विभिन्न किसिमका समस्या तथा हैरानीलाई मध्यनजर गर्दै शुक्रबारबाट इलाका प्रहरी कार्यालय लम्की र ट्राफिक प्रहरी कार्यालय लम्कीले उक्त प्यासेञ्जर हेल्प डेस्क सञ्चालनमा ल्याएको हो ।
इलाका प्रहरी कार्यालय लम्कीका प्रहरी नायव निरीक्षक शोभान सिंह कार्कीले यात्रुहरुको सेवा र सुरक्षाका लागि यात्रु सहायता कक्ष सञ्चालनमा ल्याएको जानकारी दिए ।
‘यात्रुहरुबाट बढी भाडा लिएमा, सरसामानहरु हराएमा, क्षमताभन्दा बढी यात्रु राखेमा, मापसे गरी सवारी चलाएमा, आरक्षण सीटमा यात्रुलाई नदिएमा, नक्कली टिकट वितरण गरी यात्रुलाई ठगी गरेमा यात्रुलाई विषादी खानेकुरा खुवाई लुटपाट गरेको पाइएमा तुरुन्त यात्रु सहायता कक्षमा सम्पर्क गर्न म सम्पूर्ण यात्रुहरुलाई अपिल गर्दछु,’ उनले भने– ‘हामी ठाउँको ठाउँ कारवाही गर्छौ ।’
साथै प्यासेञ्जर हेल्प डेस्क सञ्चालनमा आएपछि चाडपर्वका बेला हुने विभिन्न किसिमका आपराधिक क्रियाकलाप र समस्याहरु कम हुने लम्की प्रहरीको विश्वास छ ।
प्रतिक्रिया