बर्दिया राष्ट्रिय निकुञ्जको वृत्तचित्र निर्माण गरिने, कार्यशालाको तयारी

पोखरा, २९ माघ । बर्दिया राष्ट्रिय निकुञ्जको वृत्तचित्र निर्माण गरि अन्तराष्ट्रिय स्तरमा प्रचार प्रसार गर्न बर्दियाको ठाकुरद्वारामा फोटोग्राफी सम्बन्धि कार्यशाला हुने भएको छ । फाल्गुन ९ देखि १३ सम्म आयोजना हुने कार्यशालामा देश र विदेशबाट २० जना फोटोग्राफरहरु सहभागी हुने छन् । हिमालयन स्कुलर्स ग्रुप र ए स्क्वायर्स प्रोडक्सन प्रा.लिको संयुक्त आयोजनामा कार्यशाला हुन लागेको हो ।

हिमालयन स्कुलर्स गु्रप डब्लु डब्लु एफ नेपालबाट वन र वातावरण शिक्षा अध्ययनका लागि छात्रवृत्ति प्राप्त गरेका विद्यार्थीहरुको समूह हो भने ए स्क्वायर्स प्रोडक्सन प्रा.लि फोटोग्राफी सम्बन्धि तालिम र गोष्टिहरु आयोजना गर्दै आएको संस्था हो ।

कार्यशालामा प्रसिद्ध भारतीय फोटोग्राफर बालन माधवनको समेत उपस्थिति रहनेछ । संरक्षणको क्षेत्रमा लागेका फोटोग्राफरहरुको अन्तरास्ट्रिय सङ्गठन इन्टरनेस्नल लिग अफ कन्जरभेसन फोटोग्रफर्सका सदस्य माधवनले नेसनल जिओग्रापिकका लागि समेत काम गरिसकेका छन् । ५ दिनसम्म चल्ने कार्यशाला आयोजना गर्नका लागि करिब १६ लाख रुपियाँ लाग्ने आयोजक टिमका प्रमुख प्रसुन घिमिरेले जानकारी दिए ।

पोखरामा वन विज्ञानमा स्नातक तह दोश्रो वर्षमा पढ्दै गरेका उनले भने “डब्लु डब्लु एफ नेपाल, पन्छी संरक्षण संघ नेपाल, राष्ट्रिय प्रकृति संरक्षण कोष, नेपाल पर्यटन बोर्ड, जुलोजिकल सोसाइटी अफ लन्डन लगायतका संस्थाहरुको सहयोगले कार्यक्रम गर्न सम्भब भएको हो । हामीले सहभागी हुने फोटोग्राफरहरुबाट समेत केहि मात्रामा सहभागिता शुल्क लिएका छौं ।’ वृत्तचित्र निर्माणले बर्दिया साथै नेपालमा पर्यटन र जैविक विविधता संरक्षणको क्षेत्रमा समेत उल्लेख्य प्रचारप्रसार तथा वृद्धि हुने विश्वाश उनले ब्यक्त गरे।