मृत्युदण्ड कुरेर बसेका अमर बमको रिहाईको माग गर्दै प्रधानमन्त्रीलाई यूएईमा ज्ञापनपत्र

युएई, ३ माघ । यूएईमा मृत्युदण्डको सजाय सुनाईएर १४ बर्षदेखि कारगारको जीवन बिताईरहेका दार्चुला जिल्ला धारी गाबिसका अमर बहादुर बमलाई रिहाई गराउनुका लागि आग्रह गर्दै सुदूरपश्चिम सेवा समाज यूएईले चार दिने भ्रमणका लागि युएई आउनु भएका प्रधानमन्त्री पुष्पकमल दाहाल ‘प्रचण्ड’लाई ज्ञापन पत्र बुझाएको छ ।

प्रधानमन्त्री पुष्पकमल दाहाल प्रचण्ड विश्व उर्जा भविष्यबारेको सम्मेलनमा सहभागी हुन अबुधाबी आउनु भएको मौका छोपी सुदूरपश्चिम सेवा समाज युएईका अध्यक्ष चेतबहादुर थापाको नेतृत्वमा ज्ञापन पत्र बुझाईएको हो ।

विदेशमा गएर पैसा कमाई घरपरिवारलाई सुखसँग पाल्ने सपना बुन्दै सन् २००३ मा सवारी साधन चालकको काममा युएई आएका दार्चुला धारी गाबिसका अमर बहादुर बमलाई दुबईको इन्डियन क्लबमा भारतीय नागरिक शरद सेठ्ठीको हत्याको आरोपमा मृत्युदण्डको सजाय सुनाईएको छ ।

भारतकै मनोज मुदाना र करन सिंह राजपुतले गोली हानी सेठ्ठीको हत्या गरेको र उनीहरूको गाडी चलाउँदै आएका बम पनि हत्याको आरोपमा पक्राउ पर्नु भएको थियो । अमरलाई गाडीमै कुर्न लगाएर क्लबभित्र छिरेका मनोज र करनले हत्या गरेको र हत्यारालाई बचाउन सहयोग गरेको अभियोगमा मृत्युदण्डको सजाय सुनाईएको थियो ।

यो भन्दा पहिले विभिन्न नेपाली संघ संस्थाहरुले अमरलाई रिहाई गर्न अनुरोध गरेता पनि सरकारबाट कुनै ठोस् पहल नभएका कारण अझैसम्म रिहाई हुन सकेको छैन । बमको रिहाईका लागि गतबर्ष पनि सुदूर पश्चिम सेवा समाज युएईका महासचिब मान बहादुर केसीले काठमाडौं गएर राष्ट्रपति, प्रधानमन्त्रीको सचिबालय मार्फत र तत्कालिन उपप्रधान तथा रक्षामन्त्री भिम बहादुर रावललाई ज्ञापन पत्र बुझाएका थिए ।

प्रधानमन्त्री प्रचण्डले सोमबार युएईका युवराज शेख मोहम्मद बिन जायद बिन सुल्तान अल नह्यानसँग हुने भेटघाटमा बमको रिहाईका विषयमा कुरा गर्ने सकारात्मक आश्वाशन दिनु भएको समाजका अध्यक्ष थापाले बताउनुभयो ।