भारतसँगको कुराकानी प्रचण्डले यसरी बेलिबिस्तार लगाए, पाँच सय ३७ कैदीको कैद मिनाहा

काठमाडौँ, २ असोज । सरकारले संविधान दिवसका अवसर पारेर विभिन्न जेलमा रहेका ५३७ जना कैदीको बाँकी कैद माफी मिनाहा गर्ने निर्णय गरेको छ ।

मन्त्रिपरिषद्को आजको बैठकले ४० प्रतिशत कैद मिनाहा गरिसकेको र आचरण सुधार गरेका कैदीको कैद मिनाहा गर्ने निर्णय गरेको उपप्रधानमन्त्री तथा अर्थमन्त्री कृष्णबहादुर महराले जानकारी दिनुभयो । उनीहरुको नाम भोलि सार्वजनिक गरिने उहाँले बताउनुभयो ।

यसैगरी बैठकले गृह मन्त्रालयका सहसचिव विनोद केसीलाई सचिवमा र अर्थ मन्त्रालयका सहसचिव कृष्ण देवकोटालाई कामु सचिवमा बढुवा गर्ने निर्णय गरेको छ ।

विभिन्न सरकारी उद्योगलाई सार्वजनिक निजी साझेदारीमा सञ्चालन गर्ने, नेपाल औषधि लिमिटेडलाई सरकार आफैँले सञ्चालन गर्ने विषयमा बैठकमा सैद्धान्तिक सहमति भएको उपप्रधानमन्त्री महराले जानकारी दिनुभयो ।

भारत भ्रमणबारे बैठकमा जानकारी

प्रधानमन्त्री पुष्पकमल दाहालको आफ्नो भारत भ्रमणको उपलब्धिबारे मन्त्रिपरिषद्को आजको बैठकमा जानकारी गराउनुभएको उपप्रधानमन्त्री महराले बताउनुभयो ।

भ्रमणमा भारतीय पक्षले भव्य स्वागत र सम्मान गरेको जानकारी दिँदै दुई देशबीच विश्वासको वातावरण बनाउन र भारतीय जनताको मन जित्न भ्रमण सफल भएकोे संश्लेषण प्रधानमन्त्रीले गर्नुभएको उपप्रधानमन्त्री महराले जानकारी दिनुभयो ।

भ्रमणका क्रममा भारतका राष्ट्रपति, प्रधानमन्त्री, मन्त्री, नेतासँग भेटवार्ता गरेको, भारतीय बुद्धिजीविसँग अन्तक्र्रिया गर्नुका साथै भारतीय व्यापारीसँग भेटघाट गरेको प्रधानमन्त्रीले बैठकमा जानकारी दिनुभएको थियो ।

उपप्रधानमन्त्री महराले भन्नुभयो, “भ्रमणका क्रममा तराईको हुलाकी राजमार्गको पहिलो खण्ड सम्पन्न गर्नका लागि भारतसँग सम्झौता भयो, त्यसमा केही नेपालले लगानी गर्ने र केही भारतले सहयोग गर्ने उल्लेख छ । त्यस्तै दोस्रो खण्डका निम्ति सहयोग अगाडि बढाउने सैद्धान्तिक सहमति भएको छ ।”

त्यसैगरी भूकम्पपछिको पुनःनिर्माणका लागि भारतले दिने भनी यसअघि नै प्रतिबद्धता व्यक्त गरेको रकमका विषयमा र ढल्केबरको विद्युत् प्रसारण लाइनको क्षमता विस्तार विषयमा भ्रमणका क्रममा दुई देशबीच सम्झौता भएको प्रधानमन्त्रीले मन्त्रिपरिषद्लाई जानकारी दिनुभएको थियो । रासस