प्रचण्ड र मधेसी मोर्चाबीच कुरा मिल्यो, सहमतिको तीन बुँदे ड्राफ्ट तयार

– विमल योगी

काठमाडौं, १८ साउन । नेपाली कांग्रेस, नेकपा माओवादी केन्द्र र मधेसी मोर्चाबीच तीन बुँदे सहमतिको ड्राफ्ट तयार भएको छ ।

सहमतिपत्रमा केहीबेरमा शीर्ष नेताबाट हस्ताक्षर हुँदैछ । तीनै दलको ९ सदस्यीय कार्यदलले सहमतिको मस्यौदा तयार पारेको हो ।

स्रोतका अनुसार तीन बुँदे सहमतिपत्रको पहिलो बुँदामा राजनीतिक मुद्दाहरु फिर्ता लिने, घाइतेहरुको उपचार, शहिद घोषणा, क्षतिपूर्ति लगायतका विषय रहेका छन् ।

दोस्रोमा संविधान संशोधन, नागरिकता, सीमांकन लगायतका विषय आपसी समझदारीमा टुंग्याउने र तेस्रोमा प्रधानमन्त्री पदमा नेकपा माओवादीका अध्यक्ष पुष्पकमल दाहाल प्रचण्डलाई मतदान गर्ने उल्लेख छ ।

सहमति पत्रमा कांग्रेसबाट सभापति शेरबहादुर देउवा, माओवादीबाट प्रचण्ड र मधेसी मोर्चाबाट उपेन्द्र यादवले हस्ताक्षर गर्नेछन् ।