सरकार परिवर्तनबारे प्रधानमन्त्री ओलीको नयाँ योजना

काठमाडौं, २३ असार । सरकार परिवर्तनको चर्चाका बीच प्रधानमन्त्री केपी शर्मा ओलीले नयाँ योजना सार्वजनिक गरेका छन् ।

भूमीसुधार मन्त्रालयद्वारा बिहीवार राजधानीको बबरमहलमा आयोजित कार्यक्रमलाई सम्बोधन गर्दै प्रम ओलीले आफू नेतृत्वको सरकार परिवर्तन नभई विस्तार हुने बताए ।

सरकार परिवर्तनको हल्ला गलत हो भन्दै उनले हल्लाका पछि नलाग्न आग्रह गरे । ‘सरकार परिवर्तनको हल्लाले धेरैजना हल्लिएका छन् र कतिपयलाई त्यसैका पछि कुद्ने बानी परेको छ,’ सरकार ढाल्न सक्रिय माओवादी नेताहरुतर्फ संकेत गर्दै प्रधानमन्त्री ओलीले भने– ‘तर, सरकार परिवर्तन होइन विस्तार हुँदैछ ।’

देशका एजेण्डामा आफू नअल्मलिइ अघि बढ्ने भन्दै उनले भने– ‘देश अल्मलिंदैन, अघि बढ्छ, सबै ढुक्क हुनुस् ।’

राष्ट्रिय सरकारको सम्भावना स्वरुप ओलीले सरकार विस्तारको योजना बनाएको र त्यसका लागि सबै दलसँग परामर्श गरिरहेको बुझिएको छ ।