बल्खुमा मन्त्रीसहितको सरकारी टोलीमाथि ब्यापारीको आक्रमण, प्रहरी तैनाथ

काठमाडौं, २१ असार । राजधानीको बल्खुमा मन्त्रीसहितको अनुगमन टोलीमाथि व्यापारीहरुले आक्रमण गरेका छन् ।

आपूर्ति मन्त्री गणेशमान पुनको नेतृत्वमा सरकारी अनुगमन टोली मंगलबार विहान बल्खु तरकारी बजारमा पुगेको थियो । अनुगमन गर्न पुगेको टोलीले प्रमाणित नगरेका ढक र तराजुहरु उठाएपछि तरकारी व्यापारीहरुले आक्रमण गरेका हुन् ।

व्यापारीहरुले अनुगमन टोलीमाथि इट्टा, लौका, मुला र पानीको वोतलले आक्रमण गरेको आपूर्तिमन्त्रीका स्वकीय सचिव अर्जुनकुमार पाठकले जानकारी दिए ।

मन्त्रीसहितको टोलीमाथि आक्रमण भएपछि ठूलो संख्यामा प्रहरी परिचालन गरिएको छ ।

कालिमाटी तरकारी बजारको अनुगमन गरिसकेर आपूर्ति व्यवस्था विभाग, नापतौल तथा गुणस्तर विभाग, सुरक्षा निकायसहितको टोली बल्खु तरकारी बजारमा पुगेको थियो । जानकारी नदिएरै अकस्मात आएर अनावश्यक रुपमा दुःख दिएको भन्दै व्यापारीहरुले अनुगमन टोलीमाथि आक्रमण गरेका हुन् ।

तरकारी बजारमा प्रयोग भएका सबैजसो ढक तराजुबाट उपभोक्ता ठगिएको गुनासो आएपछि अनुगमन गर्न मन्त्री पुन आफै अनुगमनमा गएका थिए ।