काठमाडौं, २६ जेठ । जमाना यति खराब भइसक्यो कि, हुर्किएकी छोरी जोगाउनै मुस्किल । त्यसमाथि एकजना यस्ती आमा आइलागिन्, छोरी बिग्रेली भनेर रेखदेख पुगाउन कहाँ–कहाँ, उल्टै आफ्नी छोरीलाई घरबेटीको छोरासँग चुकुल ठोकेर माया बनाइदिने !
मामिला बढ्दै गएपछि अहिले जिल्ला प्रशासन कार्यालय, ललितपुरमा २० करोडको सौदाबाजी चलिरहेको छ । जनआस्था साप्ताहिकले समाचार छापेको छ ।
यस्तो घटनामा एक जना दिवंगत, सादगी र निष्कलंकित नेताको नाम अनाहक मुछिने भयो भनी केही एमाले नेता महिलाको पक्षमा लागे ।
तर, कुरो खुल्दै जाँदा कामरेडहरूको भागाभाग चलेको छ । यसरी अनाहकमा नाम जोडिन पुगेको छ, मनमोहन प्रतिष्ठानको ।
मोरङको हात्तीमुढामा अवस्थित मनमोहन पोलिटेक्निकको गाडी चलाउने चक्र कार्कीले ललितपुर, सानेपास्थित मनमोहन प्रतिष्ठानमा पत्नीलाई जागिर लगाइदिएका छन् ।
आफू बढीजसो विराटनगर बसेर काठमाडौंजस्तो ठूलो ठाउँमा पत्नीलाई जागिर र यतै छोरी पढाउने काम गर्नुलाई आफ्नो पौरख ठान्ने नै भए ।
अहिले आमा–छोरीले यस्तो पौरख देखाइदिँदा सानेपाका स्थानीय तण्डुकार परिवारमा रुवाबासी चलेको छ ।
चल र अचल सम्पत्तिले सम्पन्न, तर धर्त्याइँ नजान्ने तण्डुकारका घरको भुँइतलामा आमा–छोरी ढेरा बस्छन् ।
छोरी रुपा (नाम परिवर्तन) बिछट्टै राम्री घरबेटीका छोरा जित तण्डुकार भर्खर उमेर चढ्दै गरेका लक्का जवान । रुपा कक्षा ८ मा पढ्दादेखि उनीभन्दा केही जेठा जितसँग हिमचिम बढ्यो ।
यस्तोमा सामन्यतया आमाहरूले छोरीलाई सम्हालिनुपर्ने शिक्षा दिन्छन् । तर, रुपाकी आमाले ठीक उल्टो, छोरीलाई सन्काइन् । पाटनका सम्पत्तिवाल नेवारको छोरोसँग लाग्नु पुरस्कारजत्तिकै भयो ।
जब जित रुपालाई भेट्न कोठामा छिर्थे, आमा अर्कोतिर बाटा लाग्ने । कहिले काहिँ त छोरीलाई खर्चै दिएर घरबेटीको छोरोसँग घुम्नसमेत पठाउने ।
आमाले बुझिसकेकी थिइन्, घरबेटीको सानेपामा २१ रोपनी जमिन छ । दुई भाई छोरा छन्, दुवै सोझा ।
प्रतिक्रिया