चितवन, २१ चैत । भरतपुरमा व्यवस्थित फलफूल तथा तरकारी बजार निर्माणका लागि उपप्रधानमन्त्री तथा सहकारी एवम् गरिबी निवारणमन्त्री चित्रबहादुर केसी सकारात्मक देखिनुभएको छ ।
फलफूल तथा ताजा तरकारी थोक व्यवसायी सङ्घले आज नारायणगढमा उपप्रधानमन्त्री केसीसमक्ष बजार निर्माणको माग गरेको हो । व्यवसायीको मागप्रति सहमति जनाउँदै उहाँले उक्त विषय मन्त्रिपरिषद्मा उठाउने बताउनुभयो । देशकै मध्य भागमा रहेको बजारबाट प्रत्यक्ष रुपमा किसान लाभान्वित हुनुपर्ने भन्दै उपप्रधानमन्त्री केसीले लागत अनुसारको मूल्य किसानले पाउन नसकेको बताउनुभयो ।
“कृषि कर्ममा लागेका आम नेपाली आत्मनिर्भर बन्नुपर्छ” उहाँले भन्नुभयो । केन्द्रीय बस ट्रमिनलसँगै रहेको सहकारी विकास बोर्डको दुई बिगाहा १० कट्ठा खाली जग्गामा जिल्लाकै नमुना थोक बजार निर्माणको माग व्यवसायीले गरेका हुन् ।।
कार्यक्रममा मन्त्रालयका सचिव शङ्कर अधिकारीले बोर्डको बैठकमा एजेण्डाको रुपमा सो प्रस्तावलाई लगिने बताउनुभयो । सहकारी विकास बोर्डका सहअध्यक्ष सरद शर्माले खाली जग्गालाई उपयोग गर्ने नीति बनाएर कामअघि बढाइने बताउनुभयो ।
यस्तै सांसद कृष्णभक्त पोख्रेल, उद्योग वाणिज्य सङ्घका अध्यक्ष राजन गौतम र ताजा फलफूल तथा तरकारी थोक बिक्रेता सङ्घका अध्यक्ष थिरप्रसाद धितालले थोक बजार अतिआश्यक रहेको बताउनुभएको थियो । रासस
प्रतिक्रिया