असई रमेश सुब्बाको हत्याको जिम्मा गोइत समूहले लियो, किन गरियो हत्या ?

सप्तरी, २० पुस । तराइमा सशस्त्र संघर्ष गरिरहेको अखिल तराई मुक्ति मोर्चाले सप्तरीमा मारिएका प्रहरी सहायक निरीक्षक (असई) हत्याको जिम्मा लिएको छ ।

सोमबार साँझ एक सन्देश जारी गर्दै मोर्चाका संयोजक जयकृष्ण गोइतले आफ्नो संगठनले ४५ वर्षीय असई रमेश सुब्बाको हत्या गरेको दाबी गरेका छन् ।

मधेसमा निर्दोष जनताको हत्या गरिरहेको र त्यस कार्यलाई नरोकेकाले चेतावनी स्वरुप असई सुब्बाको हत्या गरेको गोइतको भनाई छ । यसअघि गोइत समूहले आन्दोलनमा हस्तक्षेप नगर्न सरकारलाई चेतावनी दिँदै आएका थिए ।

सोमबार साँझ ६ बजेतिर झटुकी प्रहरी चौकीका इन्चार्ज समेत रहेका असई सुब्बाको अज्ञात समूहले गोली हानेर हत्या गरेको थियो । गोली लागेर घाइते भएका सुब्वाको उपचारको क्रममा सगरमाथा अञ्चल अस्पताल मृत्यु भएको एसपी भीम ढकालले जानकारी दिए ।

सप्तरीको गोबरगाढा प्रहरी चौकीमा दरबन्दी भई उनी झुटकी प्रहरी चौकीमा काजमा कार्यरत थिए । झापा घर भएका शुब्बाको तिघ्रा र छातिमा गोली लागेको थियो । हत्याराको खोजी भइरहेको प्रहरीले जनाएको छ ।