काठमाडौं, २ पुस । तीन महिनादेखि आन्दोलन गरिरहेको संयुक्त लोकतान्त्रिक मधेसी मोर्चाले आन्दोलनका नयाँ कार्यक्रम घोषणा गरेको छ ।
शीर्ष नेता भारतको दिल्ली भ्रमणमा गएपछि आन्दोलन केही खुकुलो बनाएको मोर्चाले संविधान संशोधनका विषयमा सरकारसँग कुरा नमिलेको र अवरोध गर्दा पनि संसदले नटेरेपछि अब फेरि आन्दोलन सशक्त बनाउने निर्णय गरेको हो ।
विहीबार तराई मधेस लोकतान्त्रिक पार्टीको कार्यालय बिजुलीबजारमा बसेको बैठकको निर्णयअनुसार मोर्चाका शीर्ष नेताहरुले काठमाडौं छाड्ने भएका छन् । त्यसैगरी सीमा नाकामा धर्नासहितको आन्दोलन यथावत राख्ने र त्यसलाई झन सशक्त बनाउने, सबै जिल्लामा आमसभा, लाठी जुलुस प्रदर्शनलगायतका कार्यक्रम समेत घोषणा गरेको छ ।
यी निर्णयहरु भोलि शुक्रबार बस्ने बैठकबाट अन्तिम रुप दिएर पत्रकार सम्मेलन गरी सार्वजनिक गरिने सदभावना पार्टीका महासचिव मनिष सुमनले जानकारी दिनुभयो । उहाँले भन्नुभयो- ‘अबको आन्दोलन कि वार कि पार हुन्छ ।’
यस्तै, मोर्चाले व्यवस्थापिका संसदमा प्रस्तुत भएको संविधान संशोधन विधेयक नस्वीकार्ने र अवरोध जारी राख्ने निर्णय समेत गरेको छ ।
प्रतिक्रिया